Urukiko rukuru rwa Kampala rwemeje ko hari ibimenyetso bihagije bisaba ko Christopher Okello Onyum, ukekwaho ubwicanyi bw’abana biciwe mu irerero rya Ggaba, yiregura ku byaha by’ubwicanyi aregwa.
Nk’uko byatangajwe na Daily Monitor, umucamanza Alice Komuhangi Khaukha yatangaje uyu mwanzuro ku wa Kane, nyuma y’uko ubushinjacyaha busoje gutanga ibimenyetso byabwo, bushingiye ku batangabuhamya 18.
Yagize ati: “Nasuzumye neza ibimenyetso byatanzwe byashinjaga Okello, nsanga bihagije ku buryo bisaba ko wiregura kuri buri kimwe mu byaha bine ushinjwa.”
Nyuma y’uyu mwanzuro, urukiko rwasobanuye amahitamo Okello afite mu gihe yitegura kwiregura. Ashobora:
- Gutanga ubuhamya bw’ukuri, bishobora kubazwaho n’ubushinjacyaha (cross-examination);
- Gutanga ubuhamya budahiriye, bitabazwaho n’ubushinjacyaha;
- Cyangwa guhitamo guceceka ntiyiregure ku cyaha na kimwe.
Okello yahawe iminota 30 yo kuganira n’abamwunganira mu mategeko, Richard Kumbuga na Sarah Awelo, mbere yo kubwira urukiko amahitamo ye.
Christopher Okello Onyum akurikiranyweho ibyaha bine by’ubwicanyi, bikomoka ku gikorwa cyo gutema no kwica abana bane bato ku wa 2 Mata 2026, mu kigo cyita ku bana bato cya Ggaba Early Childhood Development Centre.
Abana bishwe ni Gideon Eteku, Keisha Agenorwoth Otim, Ignitius Sseruyange na Ryan Odeke.
