Icyumweru gishize cyagaragaje uburyo umuziki nyarwanda ukomeje kugira amabara atandukanye, aho indirimbo nshya n’izari zisanzwe zizwi zikomeje guhabwa umwanya mu bitangazamakuru no ku mbuga zicururizwaho umuziki.
Urubuga Impinga.rw rugaragaza indirimbo ziri gukundwa cyane muri iki gihe, ziganjemo izisohotse vuba n’izikomeje kugumaho mu mitima y’abakunzi b’umuziki.
“Come On” – Mike Kayihura
Mike Kayihura yagarukanye indirimbo nshya “Come On”, ari na yo ya mbere ashyize hanze ku giti cye mu gihe cy’imyaka hafi itanu. Iyi ndirimbo iri mu mushinga we wa EP yise Intwaza.
Mu gihe gito imaze hanze, imaze kurebwa inshuro zirenga 60,000 kuri YouTube, igaragaza ko yakiriwe neza n’abakunzi be.
Yakozwe na Muriroo, ihabwa ubuziranenge (mix & master) na Bob Pro, mu gihe amashusho yayo yayobowe na Harris.
“AYAYAAH” – Element Eleeeh ft Bien & Joshua Baraka
Element Eleeeh yahuje imbaraga n’abahanzi bakomeye bo muri Afurika y’Iburasirazuba aribo Bien Aime Baraza na Joshua Baraka.
Iyi ndirimbo ya afrobeat ivanze na kompa yakozwe na Element Eleeeh ubwe, igaragaza ubufatanye bukomeje gukura hagati y’abahanzi bo mu karere.
“We Made It” – Nel Ngabo & Platini P
Nel Ngabo na Platini P bakomeje kwigaragaza binyuze mu mushinga wabo uhuriweho witwa Vibranium. Iyi ndirimbo irimo amashusho agaragaza urugendo rw’ubuzima n’iterambere ryabo mu muziki.
Yakozwe na Davydenko, amashusho ayoborwa na Roddy Ray.
“Kare mu museke” – Ben & Chance
Iyi ndirimbo ya gospel ya Ben & Chance yasohotse mbere gato y’igitaramo cyabo cya Pasika cyabereye muri BK Arena.
Mu gihe gito imaze, imaze kurebwa inshuro zirenga 380,000, igahita iba imwe mu ndirimbo za gospel zikunzwe cyane muri iki gihe.
“Msingi” – Papi Clever & Dorcas
Papi Clever & Dorcas bakomeje kwagura imbibi z’umuziki wabo binyuze mu ndirimbo “Msingi” ikoze mu Giswahili, bituma igera ku bakunzi benshi muri Afurika y’Iburasirazuba.
“Extra Stamina” – Diez Dola
Nubwo imaze igihe isohotse, Diez Dola akomeje kuyobora imiziki yo mu tubyiniro n’ahandi hatandukanye i Kigali. Iyi ndirimbo imaze kurenga views miliyoni ebyiri kuri YouTube, ikaba iri no ku mushinga we wa album Propaganda iteganyijwe gusohoka muri Kamena.
Uko isoko ry’umuziki rihagaze
Izi ndirimbo zigaragaza uburyo umuziki nyarwanda ukomeje gutera imbere, uhuza abahanzi bashya n’abamaze kumenyekana, ndetse ugafungura imiryango mu karere ka Afurika y’Iburasirazuba.
