Nyuma y’imyaka myinshi abashakanye bamwe bamara bashaka umwana baraheba, ikoranabuhanga rishya rikoresha ubwenge buhangano (AI) ryatangiye gutanga icyizere ku bagabo babwirwaga ko badafite intanga ngabo.
Ubu buryo bushya bwitwa STAR bwakozwe n’abashakashatsi bo muri Columbia University Fertility Center.
Bukoresha AI mu gushakisha intanga ngabo ziba zihishe cyane ku buryo zitabonwa mu buryo busanzwe bwo gupima amasohoro.
Samuel ni umwe mu bagabo bari barabwiwe ko amahirwe yo kubyara umwana wabo bwite ari make cyane kubera ikibazo cya Klinefelter syndrome.
We n’umugore we Penelope bari bamaze imyaka irenga ibiri bagerageza kubona umwana, ibintu byabazaniye umunaniro n’agahinda.
AI ikora ibyo amaso atabona
Abahanga bakoze STAR bavuga ko iri koranabuhanga rishobora kubona intanga imwe rukumbi iba yihishe hagati y’uturemangingo twinshi cyane.
Mu buryo busanzwe, abaganga bareba amasohoro bakoresheje microscope, ariko hari igihe intanga ziba nke cyane ku buryo umuntu atazibona.
STAR yo ikoresha AI n’imashini zifata amashusho menshi cyane ku isegonda, bigafasha gutahura iyo ntanga no kuyitandukanya n’ibindi bice.
Zev Williams, umwe mu bayoboye ubu bushakashatsi, yavuze ko “bimeze nko gushaka urushinge mu kirundo cy’ibyatsi.”
Samuel yabonywemo intanga umunani gusa, ariko imwe muri zo ni yo yavuyemo urusoro rwaje gutuma umugore we atwita.
“Twongeye kugira icyizere”
Uyu muryango uteganya kwakira umwana wabo wa mbere muri Nyakanga 2026, ibintu bavuga ko batigeze batekereza ko bishoboka ukundi.
Penelope yavuze ko kumva umwana agenda mu nda ari ibintu bituma bumva inzozi zabo zatangiye kuba impamo.
Nubwo iri koranabuhanga riri gutanga icyizere ku miryango myinshi, impuguke zivuga ko hakenewe ubushakashatsi bwinshi kugira ngo harebwe neza ingaruka zarwo mu gihe kirekire.
Ariko ku miryango yari yararambiwe no gushaka umwana, STAR isa n’ifungura umuryango mushya w’icyizere.
