Mu gihe umuziki wo mu Karere ka Afurika y’Iburasirazuba ukomeje gutera imbere binyuze mu bufatanye bwambukiranya imipaka, abahanzi bakomeye The Ben na Diamond Platnumz bagiye kongera guhurira ku rubyiniro rumwe mu gitaramo giteganyijwe muri Uganda.
Aba bahanzi bazataramira i Kampala mu gitaramo cy’urwenya kizwi nka “Comedy Store,” kizaba ku wa Gatanu tariki 5 Kamena 2026. Iki gitaramo cyateguwe na Alex Muhangi, kimaze kumenyerwa mu gutumira abahanzi b’ibyamamare, kikaba ari kimwe mu bikorwa by’imyidagaduro bikurura imbaga muri Uganda.
Guhurira ku rubyiniro kw’aba bombi ntikugarukira ku gususurutsa abafana gusa, ahubwo ni ikimenyetso ubufatanye hagati y’abahanzi bo mu bihugu bitandukanye bukomeje guteza imbere umuziki w’aka karere.
The Ben na Diamond Platnumz basanzwe baziranye ndetse bakaba banafitanye indirimbo zirimo: “Why,” yakunzwe n’abatari bake, ikaba yarabafashije bombi kwagura izina ryabo mu karere no ku ruhando mpuzamahanga. Iyi ndirimbo ‘Why” yasohotse mu mwaka wa 2022, ikaba yarabaye urugero rwiza rw’uko ubufatanye bushobora gutuma umuhanzi arenga imipaka y’igihugu cye.
Si ubwa mbere aba bahanzi bagiye guhurira ku rubyiniro. Mu myaka ishize, bagiye bakorera ibitaramo kurubyiniro hrumwe no mu bihugu bitandukanye birimo Uganda n’u Rwanda. Mu 2025, bahuriye mu gitaramo “Coffee Marathon UG,” cyabereye muri Uganda, aho basusurukije abafana bari kumwe n’abandi bahanzi barimo Eddy Kenzo na Bebe Cool.
Iki gitaramo kuri iyi nshuro cyitezweho kongera kugaragaza imbaraga z’ubufatanye mu muziki w’aka karere, ndetse n’uruhare abahanzi bagira mu guhuza abakunzi b’umuziki baturutse mu bihugu bitandukanye.
Ku ruhande rwa The Ben, ni umwe mu bahanzi nyarwanda bubatse izina rikomeye mu gihugu no hanze yacyo, aho azwiho indirimbo ziganjemo iz’urukundo zifite ubutumwa biza bugera ku mitima yabenshi. Kuba yarakoreye umuziki muri diaspora byamufashije kwagura isoko rye.
Mu gihe Diamond Platnumz, ari umwe mu bahanzi bafite ijambo rikomeye muri Afurika, aho injyana ye ya Bongo Flava yayigejeje ku rwego mpuzamahanga. Yashoye imari mu muziki ndetse anafasha abandi bahanzi binyuze muri Wasafi, ibintu byatumye agira uruhare rukomeye mu iterambere ry’inganda z’umuziki muri Tanzania no mu karere.
Nubwo bakomoka mu bihugu bitandukanye, aba bahanzi bahuriye ku ntego yo gukora umuziki uhuza abantu. Igihe cyose bahuriye ku rubyiniro, biba ari ikimenyetso cy’uko umuziki ushobora kurenga imipaka, ugahuza umuco n’abantu.
Igitaramo cya “Comedy Store” kizabera i Kampala cyitezweho kuba urugero rwiza rw’ubufatanye mu bahanzi bo mu Karere ka Afurika y’Iburasirazuba bushobora kuzamura umuziki w’aka karere ku rwego mpuzamahanga.
Indirimbo ‘Why’ yasohotse mu mwaka wa 2022, ikaba ari yo collaboration yabo ya mbere kandi yakunzwe cyane muri Afurika y’Iburasirazuba. Bikaba bivugwa ko hari indi ndirimbo yaba bombi ikiri guterwa ariko kugeza ubu hakaba hataratangazwa izina ryayo.
