Haravugwa kutumvikana hagati ya Rwanda Premier League na FERWAFA ku buryo ibikombe bya BK Pro League 2025/26 bizatangwa. Impamvu nyamukuru ishingiye ku makipe yo muri Sudani ari gukina muri shampiyona y’u Rwanda.
Kutumvikana ku bikombe bya BK Pro League
Ku wa 11 Gicurasi 2026, Perezida wa FERWAFA, Shema Fabrice, yavuze ko hazatangwa igikombe kimwe gusa. Yavuze ko ikipe izarangiza ari iya mbere ari yo izacyegukana, kabone n’iyo yaba Al Hilal SC cyangwa Al Merrikh SC.
Yasobanuye ko amafaranga y’igihembo cya miliyoni 80 Frw azahabwa ikipe ya mbere mu Rwanda. Yongeyeho ko kubera amabwiriza ya CAF, amakipe yo muri Sudani adashobora guhagararira u Rwanda mu marushanwa nyafurika.
RPL yavuze ko ibikombe bibiri bihari
Mu gitondo cyo ku wa 12 Gicurasi 2026, Rwanda Premier League yahise isohora itangazo rivuguruza ibyo FERWAFA yatangaje.
RPL yavuze ko gahunda yo gutanga ibikombe bibiri itigeze ihinduka. Yavuze ko ibi byari byarumvikanyweho kuva amakipe yo muri Sudani yemerewe gukina muri BK Pro League.
Nk’uko RPL ibisobanura, ikipe yo muri Sudani izasoza iri iya mbere izahabwa igikombe cy’icyubahiro cya “BK Pro League Champions 2025/26”. Icyakora ntizahabwa amafaranga y’ibihembo.
Ikipe ya mbere mu makipe y’u Rwanda yo izahabwa igikombe cya “BK Pro League National Champions”. Ni na yo izahagararira igihugu muri CAF Champions League 2026/27.
Kugeza ubu, Al Hilal SC ni yo iyoboye urutonde rwa shampiyona n’amanota 70. Irusha amanota 11 APR FC iri ku mwanya wa kabiri.
Mu makipe y’u Rwanda, APR FC ni yo iri hafi kwisubiza igikombe. Irusha Rayon Sports amanota umunani mbere y’imikino ya nyuma ya shampiyona.
