Umuraperi Megan Thee Stallion wo muri Amerika, wamamaye mu ndirimbo nka ‘Savage yatangaje ko yahagaritse gukina mu ikinamico ya Muzika Moulin Rouge! The Musical mbere y’igihe cyari cyitezwe.
Thee Stallion yari yagombaga yagombaga gukina muri iyi kinamico ku wa 17 ukwezi kwa 5, ariko abinyujije kuri Instagram, yatangaje ko igitaramo cye cya nyuma kizabera i New York ku wa 1 ukwezi kwa 5 aho kuba ku wa 17 uko kwezi.
Ibi bibaye mu gihe Thee Stallion w’imyaka 31 mu cyumweru gishize yatangaje ko atandukanye n’umukunzi we Klay Thompson – umukinnyi wa basketball muri NBA amushinja kumuca inyuma. Aba bari bamaze igihe bari mu rukundo ruvugwaho cyane.
Mu kwezi kwa gatatu kandi Megan ubwo yari muri iriya kinamico Moulin Rouge igeze hagati yihutanywe kwa muganga i Manhattan mu Mujyi wa New York atamerewe neza.
Atangaza ko avuye muri iyo kinamico, Megan wegukanye Grammy Awards yagize ati:“Byari iby’agaciro gakomeye cyane kuba umwe mu muryango wa Moulin Rouge! The Musical.”
Uyu muhanzikazi ntiyatanze impamvu yatumye avamo mbere y’igihe, ariko ibinyamakuru muri Amerika bihuza ibi no gutandukana kwe na Klay Thompson ukinira Dallas Mavericks.
Kugeza ubu Thompson ntacyo aratangaza ku mugaragaro ku byerekeye gutandukana na Megan.
Abafana ba Megan bavuga ko amagara ye ashobora kuba atifashe neza nyuma yo kujyanwa kwa muganga mu kwezi gushize, ko nabyo bishobora kuba impamvu yabimuteye.
Megan, amazina ye nyakuri ni Megan Pete, yatangiye kumenyekana cyane nyuma yo gushyira ahagaragara EP ye ya mbere Make It Hot mu 2017.
Nyuma yaho, yinjiye ku rutonde rwa Billboard Hot 100 mu 2019 abikesha indirimbo Hot Girl Summer, mbere yo kwigaragaza byeruye ku rwego mpuzamahanga mu 2020 ubwo indirimbo ye Savage yabaga iya mbere henshi ku isi.
Iyi ndirimbo yegukanye igihembo cya Grammy cy’Indirimbo Nziza ya Rap mu 2021.
