Mu gihe Abanyarwanda n’inshuti z’u Rwanda bakomeje ibikorwa byo Kwibuka ku nshuro ya 32 Jenoside yakorewe Abatutsi mu 1994, umuryango wa ruhago mu Rwanda na wo wagaragaje ko wifatanyije n’Igihugu muri ibi bihe byo kuzirikana amateka no guha icyubahiro abazize Jenoside.
Ishyirahamwe ry’umupira w’amaguru mu Rwanda, FERWAFA, ryanyujije ubutumwa bwihanganisha no kwibuka ku mbuga nkoranyambaga, rugaragaza ko ruhago ifite uruhare mu kubaka ubumwe n’ahazaza heza h’u Rwanda.
Abakinnyi b’Amavubi batanze ubutumwa bwo Kwibuka
Bamwe mu bakinnyi b’ikipe y’igihugu y’u Rwanda, Amavubi, bagaragaje ko siporo ishobora gufasha mu kubaka igihugu kirangwa n’ubumwe.
Jojea Kwizera yavuze ko nk’abakinnyi b’Amavubi bifatanyije n’Abanyarwanda Kwibuka Jenoside yakorewe Abatutsi, ashimangira ko Igihugu cyahisemo ubumwe, ukuri no kubaka ejo hazaza heza.
Na we Abeddy Biramahire yagaragaje ko urubyiruko rukwiye gukomeza kwibuka no kurinda ubumwe n’amahoro igihugu cyagezeho.
Ku ruhande rwe, Innocent Nshuti yasabye Abanyarwanda gukomeza kurwanya abahakana n’abapfobya Jenoside yakorewe Abatutsi, bagashyira imbere ubumwe n’ubwiyunge.
Abayobozi ba FERWAFA bashimangiye uruhare rwa siporo
Emery Bayisenge yavuze ko urubyiruko ari rwo mizero y’Igihugu, bityo rukwiye kugira uruhare mu kubaka u Rwanda ruzira amacakubiri.
Umuyobozi wa Komisiyo ishinzwe iterambere rya ruhago y’abagore, Nikita Vervelde Gicanda, yavuze ko siporo igomba kuba umwanya wo kunamira abazize Jenoside no kurwanya ingengabitekerezo yayo.
Perezida wa FERWAFA, Fabrice Shema, yavuze ko Kwibuka ari inshingano ya buri Munyarwanda, ashimangira ko abasiporutifu bakwiye kuba inkingi y’ubwiyunge n’iterambere ry’u Rwanda.
