Ikipe ya Kiyovu Sports irimo gutegura impinduka zikomeye mu busatirizi bwayo, nyuma y’uko Harerimana Abdelaziz uzwi ku izina rya “Rivaldo” atandukanye na Rayon Sports, bikaba byitezwe ko agomba kwerekeza muri iyi kipe yo ku Mumena mu minsi ya vuba.
Ku wa Gatatu tariki ya 7 Mutarama 2026, Rayon Sports yatangaje ko yamaze gutandukana na Rivaldo, wari umaze igihe gito muri iyi kipe, nyuma yo kutumvikana ku hazaza he. Nubwo Rayon Sports yari yifuje kumutiza indi kipe, uyu mukinnyi yahisemo gusesa amasezerano burundu, afata umwanzuro wo gushaka indi kipe imuha amahirwe yo gukina bihoraho.
Amakuru aturuka hafi y’ikipe ya Kiyovu Sports avuga ko uyu mukinnyi ari mu biganiro bya nyuma n’ubuyobozi bw’iyi kipe, bikaba bishoboka ko yashyira umukono ku masezerano y’imyaka ibiri.
Ubuyobozi bwa Kiyovu bugaragaza ko bushaka kongera amaraso mashya mu busatirizi, cyane cyane mu gihe iyi kipe ishobora gutandukana na rutahizamu wayo akaba na kapiteni, Hamis Cedric, utaramenya neza aho azakomereza umwuga we.
Rivaldo azwi nk’umukinnyi ukina asatira anyuze ku mpande, ufite umuvuduko n’ubushobozi bwo guhanga amahirwe, ibintu Kiyovu Sports imaze igihe ishaka kugira ngo yongere umusaruro w’ibitego.
Abafana b’iyi kipe bakomeje kugaragaza ko bamushyigikiye, basaba ubuyobozi kwihutisha ibiganiro kugira ngo bamubone mu myambaro y’icyatsi n’umweru.
Umutoza wa Kiyovu Sports, Haringingo Francis, akomeje gushaka uko yakongeramo abakinnyi bazamufasha guhatanira igikombe cya Shampiyona, dore ko ikipe iri ku mwanya wa kane n’amanota 26, irushanwa atandatu na Police FC iyoboye urutonde.
Kwinjiza umukinnyi ufite uburambe muri Shampiyona y’u Rwanda nka Rivaldo byafasha iyi kipe gukomeza guhatana no kugabanya icyo cyuho.
Ku rundi ruhande, Rayon Sports yo irimo gutunganya urutonde rwayo, aho imaze gusinyisha abakinnyi bashya batandukanye hagamijwe kongera imbaraga mu byiciro bitandukanye by’ikipe.
Gusa iri vugurura ryatumye hari bamwe mu bakinnyi batagifite umwanya uhagije, barimo n’abo bivugwa ko bashobora kuyisohokamo mu minsi iri imbere.
Rivaldo wari winjiye muri Rayon Sports muri Nyakanga 2025 avuye muri Gasogi United, ntiyabashije kugaragaza umusaruro mwinshi witezwe, ariko abasesenguzi b’umupira w’amaguru bavuga ko impinduka y’ikipe n’imikinire bishobora kumuha amahirwe mashya yo kugaragaza impano ye muri Kiyovu Sports.
Mu gihe ibiganiro byakomeza kugenda neza, Kiyovu Sports yaba yongeyemo umukinnyi ushobora gutanga umusanzu mu rugendo rurerure rwa Shampiyona, mu gihe Rivaldo we yaba abonye andi mahirwe yo kongera kwiyubaka no kwisubiza icyizere cy’abafana n’abatoza mu mupira w’u Rwanda.
