General Shadmani yari aherutse gusimbura Gholamali Rashid, wishwe mu cyumweru gishize ubwo Israel yatangiraga ibitero bikomeye kuri Irani ku wa Gatanu. Shadmani yari ashinzwe guhuza ibikorwa hagati y’ingabo zidasanzwe z’umutwe wa IRGC (Iranian Revolutionary Guard Corps) n’igisirikare gisanzwe cya Irani.
Nubwo ibitangazamakuru byo muri Irani bitaratangaza ku mugaragaro urupfu rwe, ibitero bya Israel byakomeje kwibasira abayobozi bakuru b’igisirikare cya Irani.
Igisirikare cya Israel (IDF) cyatangaje ko cyishe General Major Ali Shadmani, wari uherutse kugirwa Umuyobozi w’Ibiro Bikuru bya Gisirikare muri Irani, mu gitero cyabaye mu ijoro ryakeye i Tehran.
Mu gitero cy’ijoro ryakeye, humvikanye ibiturika bibiri mu mujyi wa Tabriz, uherereye mu majyaruguru ashyira uburengerazuba bwa Irani. IDF yatangaje ko yibasiye ibigo bya gisirikare bibikwamo ibisasu bya misile n’imbunda za muzinga.
Israel ivuga ko ibyo bitero ari igice cy’ingamba zo kwirinda ibyago bituruka ku bikoresho bya gisirikare bya Irani bishobora guteza umutekano muke mu karere.
Mu gitondo cyo kuri uyu munsi, IDF yatangaje ko Irani yarashe misile 30 zerekeza muri Israel. Nubwo hafi ya zose zapfubirijwe mu kirere, hari nizageze ku butaka zikomeretsa abantu n’ibikorwa remezo.
Ibisasu byumvikanye mu mijyi ya Tel Aviv na Yerusalemu. Ishami ry’ubutabazi muri Israel, Magen David Adom, ryavuze ko abantu batanu bakomerekeye ku muhanda wa bisi hagati mu gihugu.
Amwe mu makurudukesha BBC avuga ko Ishami rya gisirikare cya Irani rishinzwe ibikorwa byo mu kirere (IRGC Air Force) ryatangaje ko ryagabye ibitero ku nyubako za gisirikare za Israel, zirimo icyicaro cy’ubutasi cya Mossad n’indi myanya y’ingenzi mu rwego rw’iperereza.
Yakomeje igira iti:” Ibi byatangajwe n’ubutasi bwa Irani, aho byavuzwe ko ari igikorwa cyo kwihimura ku bwicanyi Israel yakomeje gukorera abayobozi ba Irani.
Nyuma y’itangazo, Perezida wa Leta Zunze Ubumwe za Amerika Donald Trump, yasabye abaturage ba Tehran guhunga hakiri kare.
Arash, umwe mu bavuye muri Tehran, yatangaje ko yahunze ajya muri Armenia anyuze mu mujyi wa Qazvin. Yagize ati:“ Urugendo rwamfashe amasaha atanu, nubwo rusanzwe rutwara isaha n’igice gusa. Abantu benshi barimo kugerageza guhunga igihugu.”
Impinga.rwa
Umwanditsi: Alex RUKUNDO
