Umuhanzikazi nyarwandakazi Alyn Sano akomeje kwandika amateka mashya mu muziki nyarwanda, nyuma yo kwitabira ku nshuro ya mbere inama mpuzamahanga ya The NAMM Show 2026 iri kubera muri Leta Zunze Ubumwe za Amerika.
Iyi nama ihuza abakora umuziki n’inganda ziwushingiyeho, ikomeje kubera urubuga rufatika rw’uyu muhanzikazi mu kwagura icyerekezo cye ku rwego mpuzamahanga.
Ku munsi wa gatatu w’iyi nama iri kubera muri Anaheim Convention Center, Alyn Sano yibanze ku biganiro byimbitse n’abahanzi n’amatsinda akomeye ku rwego rw’Isi, agamije gushaka ubufatanye bushya bushobora kuvamo imishinga ikomeye yambukiranya imipaka.
Mu biganiro byagarutsweho cyane harimo ibyagiriyeho na The Renaissance Orchestra, itsinda rizwi mu guhuza umuziki wa kera n’uw’iki gihe, ndetse n’umuhanzi n’umutegura indirimbo J Black, uzwi mu mishinga ihuza injyana zitandukanye ku rwego mpuzamahanga.
Ibi biganiro byafashwe nk’intambwe ikomeye igaragaza ko Alyn Sano atitabiriye NAMM nk’umushyitsi usanzwe, ahubwo nk’umuhanzi ushaka gufata umwanya uhoraho ku isoko ry’Isi.
Mu kiganiro gito yagiranye n’itangazamakuru, Alyn Sano yavuze ko uyu mwanya yawufashe nk’ishuri n’urubuga rwo kwagura imitekerereze ye mu muziki.
Ati: “NAMM ni ahantu ho kwiga no kuganira ku ejo hazaza h’umuziki. Nishimiye ko ndi hano mpagarariye u Rwanda, ariko nanone nshaka ko uru rugendo rugirira akamaro n’abandi bahanzi bazaza nyuma.”
Abari bakurikiranye ibikorwa bye bagaragaje ko uyu muhanzikazi yakunze kugaragara mu biganiro n’abantu batandukanye bo mu nzego zitandukanye z’umuziki, ibintu byerekana icyerekezo cyo kwagura isoko rye no guhuza umwimerere w’umuziki nyarwanda n’isoko mpuzamahanga.
Nubwo hataratangazwa umushinga uhamye w’ubufatanye, abasesenguzi bemeza ko guhuza umuziki wa Afro-pop na Soul wa Alyn Sano n’imiririmbire ya orchestre nini za The Renaissance Orchestra bishobora gutanga umusaruro udasanzwe, ugafasha umuziki nyarwanda kugera ku rundi rwego.
Mu gihe The NAMM Show 2026 igenda isatira umusozo, Alyn Sano aracyari mu biganiro no gushakisha andi mahirwe ashobora kuvamo imishinga mishya, mbere yo gukomeza izindi gahunda ze zo mu muziki.
Uru rugendo rwe muri Leta Zunze Ubumwe za Amerika rufatwa nk’intambwe igaragaza impinduka mu buryo abahanzi nyarwanda bagenda bigaragaza ku ruhando mpuzamahanga, aho bitakiri uguhagararira igihugu gusa, ahubwo no kugira uruhare mu biganiro bigena icyerekezo cy’umuziki w’Isi.
