Nyuma y’iminsi mike batangaje ko bamaze kwiyunga no gushyira ku ruhande amakimbirane yari amaze igihe hagati yabo, umwuka mubi wongeye kudogera hagati ya Regis na Micky, ibintu byatunguye benshi mu bakurikiranira hafi ibikorwa byabo.
Ibi byongeye kugaragara nyuma y’uko Regis anyujije ubutumwa ku rubuga rwe rwa Instagram, agaragaza ko Micky yamureze kuri YouTube, bituma imwe muri filime yari yashyize kuri uru rubuga isibwa kubera ikibazo cy’uburenganzira ku mutungo bwite (copyright).
Nk’uko bigaragara mu butumwa bwa YouTube bwashyizwe hanze, iyo filime yasibwe yari ifite umutwe ugira uti “INDAYA MUKIGO: Military Love ft Killman [Nyaxo, Manase, Ben, Mia, Queen]”. YouTube yavuze ko yakiriye ubusabe bwo kuyikuraho hashingiwe ku ifoto y’umwimerere yakoreshejwe nk’ishusho iyiranga (thumbnail), bikavugwa ko ubusabe bwo kuyisiba bwatanzwe na Mukobwajana Asifiwe, izina Regis ahamya ko rifitanye isano na Micky kuko ari yo mazina ye nyakuri.
Regis yavuze ko iki gikorwa cyamubabaje cyane, cyane ko yari yizeye ko amakimbirane yose yamaze kurangira. Yagize ati: “Njye narinzi ko nta mwanzi mfite ariko ndatunguwe. Sinkunda ibibazo, nikundira amahoro murabizi. Hari haciyeho iminsi dutangiye filime yacu, niba ari ishyari, niba ari ubugome, biba biranshanze.”
Yakomeje avuga ko iki kibazo gishobora gushyira mu kaga umuyoboro we wa YouTube (channel), kuko iyo umuntu akomeje kuregwa kenshi kuri uru rubuga bishobora kuvamo kuwusiba burundu, bikaba byagira ingaruka ku bikorwa bye by’ubuhanzi.
Kugeza ubu, Micky ntaragira icyo atangaza ku mugaragaro kuri ibi birego, mu gihe abakunzi babo bakomeje kwibaza icyaba cyihishe inyuma y’uku kudahuza kongeye kugaragara, nyuma y’uko bari bamaze kugaragaza ko bumvikanye.
Ibi bikomeje kwerekana ko n’ubwo kwiyunga bitangazwa, rimwe na rimwe ibibazo bishobora kongera kugaruka mu gihe bitakemuwe mu mizi. Abakurikiranira hafi uru ruganda rw’imyidagaduro bakaba bakomeje gutegereza kureba uko iki kibazo kirangira n’icyo impande zombi zizatangaza mu minsi iri imbere.
