Uwahoze ari Minisitiri w’Intebe wa Canada, Justin Trudeau, yongeye kuvugisha benshi ku rwego mpuzamahanga, atari gusa ku mpamvu za politiki, ahubwo no ku mubano we urimo kuvugwa cyane n’icyamamare mu muziki ku Isi, Katy Perry, ubwo bombi bagaragaraga mu nama ya World Economic Forum iri kubera i Davos mu Busuwisi.
Katy Perry yari mu bitabiriye iyi nama mpuzamahanga yitabiriwe n’abayobozi b’ibihugu, abanyapolitiki, abayobozi b’ibigo by’ubucuruzi n’ibyamamare bitandukanye.
Uyu muhanzi w’Umunyamerika yicaye ku murongo w’imbere, mu gihe Justin Trudeau yatangaga ijambo rye ryibanze ku ruhare rwa “soft power” mu miyoborere y’Isi ya none.
Nubwo ijambo rya Trudeau ryari rifite ishingiro rya politiki n’iterambere, kwigaragaza kwa Katy Perry hafi ye byahise bikurura amarangamutima n’ibitekerezo by’abitabiriye inama ndetse n’abakurikiranira hafi imyidagaduro n’ubuzima bw’ibyamamare.
Ijambo rya Trudeau ryasamiwe hejuru, ariko amaso ahanwa ku buzima bwe bwite
Mu ijambo rye, Justin Trudeau yashimangiye ko imbaraga zishingiye ku muco, indangagaciro n’imyitwarire y’igihugu bishobora kugira uruhare runini mu kuyobora Isi mu bihe by’umutekano muke mu bya politiki.
Yirinze kuvuga ku gihugu na kimwe mu buryo bweruye, ariko agaragaza ko indangagaciro za demokarasi zagabanutse no mu bihugu byari zisanzwe zizwiho kuzirengera.
Yashimangiye kandi ko Canada izahora iharanira ubwigenge bwayo, yivuye inyuma amagambo yavuzwe n’uwahoze ari Perezida wa Leta Zunze Ubumwe za Amerika, Donald Trump, wavuze ko Canada ishobora kuba leta ya 51.
Nubwo aya magambo yari akomeye mu bya politiki, abakurikiranye iyi nama bagaragaje ko kuba Katy Perry yari aho, yicaye mu mwanya ugaragara, byatumye benshi bibaza ku mubano umaze igihe uvugwa hagati ye na Trudeau.
Urukundo rutangiye kuvugwa mu mpeshyi ya 2025
Amakuru ajyanye n’umubano wa Justin Trudeau na Katy Perry yatangiye kuvugwa mu mpeshyi ya 2025, ubwo uyu muhanzi yari mu Mujyi wa Montréal mu rugendo rwe rw’ibitaramo bizenguruka Isi.
Icyo gihe, byavuzwe ko Trudeau yamufashije gutemberana n’imbwa ye muri Pariki ya Mount Royal, ibintu byafashwe nk’ibisanzwe ariko nyuma bikaza gufatwa nk’ikimenyetso cy’umubano wihariye.
Aba bombi banagaragaye basangira amafunguro muri restaurant izwi cyane Le Violon, barangiza umugoroba mu buryo bw’abantu bari kumwe mu bihe byiza.
Nubwo nta n’umwe muri bo wari wigeze atangaza ku mugaragaro iby’uyu mubano, kwigaragara kwabo i Davos byongeye guha imbaraga amakuru avuga ko urukundo rwabo rukomeje gufata indi ntera.
Trudeau: kuva muri politiki ajya mu buzima bwisanzuye
Justin Trudeau yatangaje kwegura ku mwanya wa Minisitiri w’Intebe muri Mutarama 2025, nyuma yo kuyobora Canada hafi imyaka 10. Yasimbuwe na Mark Carney, watorewe kuyobora iki gihugu muri Werurwe 2025.
Kuva yava ku buyobozi, Trudeau agaragara nk’uwahisemo kwinjira mu buzima bwisanzuye, aho asigaye agaragara mu bikorwa bitandukanye birimo ibiganiro mpuzamahanga, ibikorwa by’umuco n’imyidagaduro.
Kuba agaragara mu nama mpuzamahanga ari kumwe n’umuhanzi w’icyamamare nka Katy Perry, byatumye benshi bavuga ko Trudeau ari mu gice gishya cy’ubuzima bwe, gihuriza hamwe politiki, umuco n’ubuzima bwite.
World Economic Forum irenze politiki
World Economic Forum ni inama ngarukamwaka ihuza abayobozi bakomeye ku Isi, igamije kuganira ku bukungu, umutekano n’iterambere. Uyu mwaka iri kubera i Davos ku nshuro ya 56, kuva ku wa 19 kugeza ku wa 23 Mutarama 2026.
Yitabiriwe n’abantu barenga 3.000 baturutse mu bihugu 130, barimo abakuru b’ibihugu na za guverinoma 65, abayobozi b’inzego nkuru, sosiyete sivile n’abashakashatsi.
Gusa kuri iyi nshuro, iyi nama ntiyagarutsweho gusa ku byemezo n’ibiganiro bya politiki, ahubwo yanabaye urubuga rw’ibiganiro by’imyidagaduro, aho umubano wa Justin Trudeau na Katy Perry wabaye umwe mu wavuzwe cyane ku mbuga nkoranyambaga no mu itangazamakuru mpuzamahanga.
