Abakunzi b’umuziki nyafurika by’umwihariko uw’i Uganda batuye mu Bwongereza no mu bindi bihugu by’i Burayi bagiye kubona ibyishimo bidasanzwe ku munsi w’abakundana, tariki ya 14 Gashyantare 2026, aho abahanzi bakomeye Spice Diana na Iryn Namubiru bazataramira mu gitaramo cyihariye kizabera i Londres.
Iki gitaramo cyateguwe mu rwego rwo kwizihiza umunsi w’abakundana kizahuza abahanzi bakunzwe cyane muri Uganda, aho Spice Diana na Iryn Namubiru bazaba ari bo bayoboye abandi ku rubyiniro. Bazahurira hamwe n’abandi bahanzi barimo Mikie Wine, Liam Voice, Kapeke, Bella Mubiru ndetse n’itsinda ry’abahungu B2C, bose bazava muri Uganda bagiye gususurutsa abakunzi b’umuziki.
Nk’uko byatangajwe n’abategura iki gitaramo, abazitabira bazaryoherwa n’umuziki w’urukundo, imbyino n’umuco nyafurika, bikazaba umwanya mwiza wo kwishimana no kwizihiza urukundo. Hazanabaho ibitaramo byihariye bya Sanyu Vocals, mu gihe umuziki wo kubyina uzaba utunganywa na ba DJ bakunzwe barimo DJ Hope, Mac Pro na DJ Shady.
Iki gitaramo kizabera muri Royal Regency, imwe mu nzu zizwi cyane zakira ibitaramo bikomeye i Londres. Kizayoborwa n’abanyamakuru b’ibyamamare Nancy Kitaka na Jackie Matovu, biteganyijwe ko bazatanga umwihariko mu kuyobora igitaramo no gususurutsa abacyitabiriye.
Iki gikorwa cyateguwe kandi gishyigikiwe na TGM Events UK, TGM Radio UK na Club Supreme. Abategura bemeza ko biteganyijwe ko kizitabirwa n’abantu benshi baturutse mu Bwongereza no mu bindi bihugu by’i Burayi, by’umwihariko Abanya-Uganda n’abandi bakunzi b’umuziki nyafurika.
Amatike yo kwinjira muri iki gitaramo yamaze kujya ku isoko, aho itike isanzwe igura amapawundi 50 (£50) mu gihe itike ya VIP igura amapawundi 70 (£70). Biteganyijwe ko iki gitaramo kizaba kimwe mu bikomeye by’umuziki nyafurika bizabera mu Bwongereza muri uku kwezi kwa Gashyantare.
