Sinema yo muri Uganda ikomeje gutera imbere ku rwego mpuzamahanga, aho yongeye kwandika amateka.
Filime yanditswe na Loukman Ali mu mwaka wa 2020 yitwa The Girl in the Yellow Jumper yegukanye ibihembo byinshi, kandi izwiho kuba iteguwe mu buryo budasanzwe buzwi muri filime. Iyi filime yamaze kugera ku mashene (channel) ya Canal+ mu Bufaransa, aho isohoka mu rurimi rw’Igifaransa yiswe La fille au pull jaune (bisobanura “Umukobwa wambaye umupira w’umuhondo”).
Loukman yashyize hanze agace gashya k’iyi filime kasubiwemo mu rurimi rw’Igifaransa, bigaragaza indi ntambwe ikomeye yatewe n’iyi filime yanditse amateka mashya mu ruganda rwa sinema muri Uganda.
Iyi filime yabaye iya mbere muri Uganda yerekanwe kuri Netflix, ibintu byafunguye amarembo mashya ku bahanzi n’abanditsi b’inkuru bo muri icyo gihugu. Kuba yageze no kuri Canal+ ni indi ntambwe ikomeye, ndetse birashoboka ko ari yo filime ya mbere y’Umunya-Uganda igeze kuri urwo rubuga.
Loukman ni we wenyine mu banditsi ba filime bo muri Uganda ufite ibikorwa byinshi byerekanwa kuri Netflix, birimo The Girl in the Yellow Jumper na Katera of the Punishment Island. Ibikorwa bye bikomeje kuzamura sinema y’iwabo, bikenemezwa n’abatari bake ko ari byo bikorwa bitangaje cyane mu myaka ya vuba muri Uganda.
Mu kiganiro yagiranye n’itangazamakuru kuri iyi ntambwe yateye, Loukman yagize ati: “Iyi filime inaboneka no ku rubuga rwa ALBLK muri Amerika, ku bifuza kuyireba bahatuye.”
Yongeyeho ati: “Sinzi na gato icyo bakundira iyi filime.” Uyu mukinnyi wa filime akaba n’umuyobozi wayo, hamwe n’ikipe ye, bakomeje kugaragaza ubutwari n’ubwitange mu guteza imbere sinema yo muri Uganda.
