Iri rushanwa ryari rimaze iminsi ibiri rikinwa ryateguwe n’Ishyirahamwe Nyarwanda ry’Umukino wa Volleyball (FRVB) n’Urwego rushinzwe Intwari z’Igihugu, Imidali n’Impeta by’Ishimwe (CHENO).
Insanganyamatsiko yo kwizihiza Umunsi w’Intwari z’Igihugu ku nshuro ya 31 uyu mwaka wabaye tariki ya 1 Gashyantare igira iti “Ubutwari n’Ubumwe bw’Abanyarwanda, inkingi z’iterambere.
Amakipe 16 ni yo yitabiriye iri rushanwa arimo umunani mu bagabo n’andi umunani mu bagore.
Umukino wa nyuma mu bagabo wahuje REG VC yageze ku mukino wa nyuma itsinze Police amaseti 3-0 na Kepler VC yatsinze APR VC amaseti 3-2.
Mu bagore umukino wa nyuma wahuje APR WVC yageze ku mukino wa nyuma yatsinze Rwanda Revenue Authority amaseti 3-0 na Police WVC yasezereye Kepler WVC amaseti 3-1.
Mu bagore, Police WVC yegukanye igikombe nyuma yo gutsinda APR WVC bigoranye amaseti 3-2 (16-25, 25-19, 23-25, 26-24, 15-10).
Mu wundi mukino, ikipe ya Kepler yaje gutwara igikombe cya gatatu nyuma yo gushingwa mu 2023 itsinze REG VC amaseti 3-1 (25-18, 20-25, 25-20, 25-18).
Mu mikino yo guhatanira umwanya wa gatatu, ikipe ya Police mu bagabo yatsinze APR VC biyoroheye amaseti 3-0, byatumye iyi ya nyuma iva mu irushanwa nta seti n’imwe itsinze, mu gihe Kepler WVC mu bagore yatsinze Rwanda Revenue Authority amaseti 3-1.
