Inkuru ikomeje kuvugwa mu bice bitandukanye by’Umujyi wa Kigali ni iy’umuryango wavuzwemo ibibazo bikomeye by’ubuhemu, nyuma y’uko umugabo afatiye umugore we mu cyuho ari kumwe n’undi mugabo muri Lodge imwe yo mu mujyi.
Amakuru avuga ko uyu mugore yari avuye mu rugo rwe ruherereye mu Murenge wa Kigarama, Akarere ka Kicukiro, abwiye umugabo we ko agiye mu butumwa bw’akazi mu Ntara y’Iburengerazuba, by’umwihariko mu Mujyi wa Kibuye. Nyamara, ibyo yari yavuze byaje kugaragara ko bitari ukuri.
Ibyabaye byatangiye kumenyekana mu ijoro ryo ku wa Kabiri, tariki ya 13 Mutarama 2026, ubwo inshuti y’uyu muryango ituye mu gace ka Nyamirambo yabonaga uwo mugore yinjira muri Lodge iri muri uwo murenge, ihita imenyesha umugabo we.
Umwe mu bantu bazi uko byagenze yabwiye umunyamakuru wa Impinga.rw wari aho hafi ko nyuma yo guhabwa ayo makuru, umugabo yahise afata inzira ajya kuri iyo Lodge. Icyakora, agezeyo asanga umugore n’uwo bari kumwe bari bamaze kwinjira mu cyumba kandi gifunze, bituma afata umwanzuro wo gutegereza.
Nyuma y’igihe gito, umugore n’uwo mugabo basohotse mu cyumba, maze bahita bahura n’umugabo we wari utegereje. Amakuru avuga ko uwo mugore yahise agira ubwoba bukomeye, ananirwa kugira icyo avuga, mu gihe umugabo we yamusabaga ibisobanuro ku byo yari yabeshye.
Abakorera muri iyo Lodge babwiye uyu munyamakuru wa Impinga.rw ko uwo mugore yari asanzwe ahazwi, ndetse ngo atari ubwa mbere yari ahahuriye n’uwo mugabo bafatanywe. Ibi byongeye gushimangira amakuru umugabo we yari asanzwe yumva, ariko akayafata nk’ibihuha.
Uyu mugabo na we yemeje ko yari amaze igihe atangiye gushidikanya ku myitwarire y’umugore we, cyane cyane kubera uko yahoraga kuri telefone no gutaha atinze yitwaje impamvu z’akazi. Gusa ngo ntiyigeze agira ibimenyetso bifatika kugeza ubwo ibi byabaga.
Nyuma yo kumufatira mu cyuho, umugabo yahise afata icyemezo cyo gutandukana n’umugore we, amubwira ko agomba kuva mu rugo rwabo. Abari hafi aho bumvise amagambo akomeye yavuzwe, arimo n’ayo yamusabaga kujyana n’uwo mugabo bari bafatanywe, mu rwego rwo kwirinda ko ikibazo cyahinduka icyaha.
Ku rundi ruhande, umugabo wafatanwe n’uwo mugore yasohotse muri Lodge afite ikimwaro gikomeye, ahita yifatira moto arigendera, adatanze ibisobanuro.
Iyi nkuru yongeye kugaragaza ingaruka z’ubuhemu mu ngo, by’umwihariko iyo bushingiye ku binyoma n’ibanga rikabije. Abasesenguzi b’imibanire y’abantu bagaragaza ko kutizerana no kubeshyana ari byo ahanini bituma imiryango isenyuka, bityo bagasaba abashakanye guharanira ukuri, kuganira no gushaka inama hakiri kare mbere y’uko ibibazo bigera ku rwego rwo gufata imyanzuro ikakaye.
