Perezida wa Leta Zunze Ubumwe za Amerika, Donald Trump, yongeye gutera urujijo mu isoko ryo kwerekana filime n’amashusho nyuma yo kugaragaza impungenge ku masezerano mashya Netflix yatangaje yo kugura igice cya Warner Bros Discovery (WBD) ku giciro cya miliyari 72$.
Ibinyamakuru bya New York Times na CNN bivuga ko Trump yatangaje ibi ku wa 7 Ukuboza 2025, aho yibukije ko Netflix na Warner Bros ari ibigo binini ku rwego mpuzamahanga, bityo kubihuza bidashingiye ku igenzura rihagije bishobora guteza ikibazo mu isoko ry’itangazamakuru n’imyidagaduro. Yavuze ko kugurwa kw’iki gice cya WBD byaha Netflix ubudahangarwa mu isoko ryo kwerekana filime ku buryo guverinoma ye izahagurukira kureba ko nta busumbane cyangwa gucunaguzwa byahavuka.
By’umwihariko New York Times yo ivuga ko mu masezerano yatangajwe na Netflix, azatuma ihabwa uburenganzira ku mitungo y’ikirango izwi cyane mu ruganda rwa sinema nka Batman, Harry Potter, na Game of Thrones, kimwe n’uburenganzira ku mafilime n’amafaranga menshi yinjijwe n’ama studios muri uyu mwaka. Ibi byose byongera imbaraga za Netflix mu bucuruzi bw’amasinema, kandi bikayigira ku rwego rutari rusanzwe ku bigo bisanzwe bikora filime.
Nubwo bimeze bityo, inzira iracyari ndende kuko aya masezerano agomba kubanza kunyura mu isuzumwa rikomeye ry’abagenzuzi b’amasoko mu bihugu bitandukanye, cyane cyane muri Leta Zunze Ubumwe za Amerika. Biteganyijwe ko ibyo igenzura bizarangira muri 2026, mbere y’uko Netflix yemererwa burundu kugura iki gice cya Warner Bros.
Abahanga mu bukungu n’amasoko bavuze ko amagambo ya Trump yerekana ko ibiro bye bizahagurukira kureba neza imikorere y’aya masezerano, cyane cyane mu kurinda ko isoko ryo kwerekana filime ryiharirwa n’ikigo kimwe gikomeye. Bavuga ko niba Netflix yegukanye Warner Bros, bishobora guhindura uburyo isoko rya filime rikoramo, bityo hakenewe ibisuzumwa bihamye kugirango harindwe ihiganwa ririmo uburinganire.
Ni inkuru ikomeje gukurikiranwa mu myidagaduro no mu bukungu, aho benshi bategereje kureba niba Netflix izahabwa uburenganzira busesuye cyangwa niba leta izashyiraho imbogamizi zikomeye.
