Umuhanzi ukomeye muri Uganda, Alien Skin, yasabye bagenzi be bo mu ruganda rw’umuziki gusubira gushyira imbaraga mu muziki, nyuma y’uko amatora rusange n’ibihe byo kwiyamamaza byasojwe.
Uyu muhanzi yavuze ko igihe cya politiki kirangiye, bityo ko ubu ari umwanya wo kongera kwibanda ku bihangano no gusubiza umuziki ku murongo nyawo.
Ku wa 15 Mutarama, Abanya-Uganda bitabiriye amatora y’Umukuru w’Igihugu n’abagize Inteko Ishinga Amategeko.
Perezida Yoweri Kaguta Museveni ni we watangajwe nk’uwatsinze aya matora, nyuma yo kubona amajwi menshi kurusha abandi.
Mu matora y’abagize Inteko Ishinga Amategeko, nta muhanzi n’umwe washoboye kubona umwanya, ibintu byabaye nk’igihombo ku bahitamo kwinjira muri politiki.
Aganira ku byavuye mu matora, Alien Skin yavuze ko nta mpamvu ikiriho yo gukomeza kwitwaza politiki mu bisobanuro by’uko umuziki wagenze muri icyo gihe.
Yagize ati: “Ubu amatora n’imyiyamamazo byarangiye. Abahanzi bo muri Uganda, igihe kirageze cyo guhangana n’ukuri.”
Alien Skin yavuze ko hari igihe kinini kiri imbere mbere y’uko politiki yongera gusubira ku murongo, bityo ko abahanzi bakwiye kubyaza umusaruro icyo gihe.
Yagize ati: “Hari ikiruhuko kirekire cya politiki. Niba wahisemo kwinjira muri politiki, ni amahitamo yawe. Ariko ubu nta rwitwazo rukiriho. Reka umuziki uvuge.”
Uyu muhanzi yanavuze ko igihe kiri imbere ari amahirwe ku bahanzi yo kongera kubaka umubano n’abafana babo, gukora indirimbo nshya no kongera gusohoka ku rubyiniro.
Yashimangiye ko abahanzi bagomba gusubira ku byabubakiye izina, aho gushaka impamvu zituruka ku bindi byemezo byabo.
Mu myaka yashize, umubare w’abahanzi binjiye muri politiki muri Uganda wariyongereye, bamwe bagahagararira imyanya itandukanye.
Icyakora, ibisubizo by’amatora byagaragaje ko kuba umuhanzi bidahita bisobanura ko ushobora gutsinda mu matora.
Ubutumwa bwafashwe nk’ubwibutsa urugendo rw’umuziki
Ubutumwa bwa Alien Skin bwakiriwe mu buryo butandukanye ku mbuga nkoranyambaga, bamwe babufata nk’ubwibutsa abahanzi inshingano zabo mu ruganda rw’imyidagaduro.
Abandi babonye ari amagambo akakaye asaba ko abahanzi basubira ku byo bazi neza, aho gukomeza kwivanga mu bintu bitabareba mu buryo butaziguye.
Mu gihe Uganda yinjira mu kindi gihe cya politiki kitarimo amatora, amaso y’abakunzi b’umuziki ahanzwe ku bahanzi, harebwa niba koko bazongera gushyira imbere umuziki n’ibihangano.
Abasesenguzi b’imyidagaduro bavuga ko ibi bishobora kuba intangiriro y’igihe gishya ku muziki wa Uganda, wibanda ku ireme n’udushya.
