Umunyarwandakazi Elizabeth Mbabazi yakatiwe n’urukiko rwo muri Uganda gufungwa amezi atandatu, nyuma yo kumuhamya uruhare mu mugambi wo kwiba banki amafaranga menshi, inkuru yakuruye impaka zikomeye.
Uko byagenze muri uyu mugambi
Ni icyemezo cyafashwe n’Urukiko rwa Uganda mu mpera z’icyumweru gishize, rushingiye ku ruhare rwe mu mugambi wo kwiba Stanbic Bank amashilingi miliyoni 725, angana n’arenga miliyoni 280 z’amafaranga y’u Rwanda.
Uyu mugambi wari ugamije kwibasira ishami ry’iyi banki riherereye mu nyubako ya Acacia Mall i Kampala.
Ubushinjacyaha bwagaragaje ko Mbabazi yakoresheje inyandiko mpimbano, aho yiyise Enid Kukunda, agerageza kubikuza amafaranga arenze ayo yari afite kuri konti.
Ibyaha yemeye n’uko yireguye
Mu iburanisha, Mbabazi yemeye uruhare rwe muri uyu mugambi, ndetse atanga ubuhamya ku buryo wari uteguye. Yavuze ko yashowe muri ibi bikorwa na mugenzi we witwa Flower Njawuzi, wamwijeje ko azamuha amafaranga.
Yagize ati, yizezwaga guhabwa amashilingi miliyoni 10 mu gihe umugambi wari kugenda neza.
Yanavuze ko atari azi neza ko inyandiko bari gukoresha ari mpimbano, agaragaza ko atari azi gusoma neza, ndetse ko mu bo bari kumwe azi neza Njawuzi gusa.
Abandi bareganwa na we bageze he?
Mu gihe Mbabazi yemeye ibyaha, abandi bareganwa na we barimo Faridah Kobusingye, Flower Njawuzi na Joel Mucunguzi bo baracyabihakana.
Urubanza rwabo ruracyakomeje, aho biteganyijwe ko bazongera kuburanishwa ku wa 13 Mata 2026.
Nubwo Mbabazi yakatiwe igihano cy’amezi atandatu, iyi dosiye ikomeje gukurikiranwa cyane, bitewe n’uburyo uyu mugambi wari wateguwe ndetse n’amafaranga menshi wari ugamije kwibwa.
