Siporo Rusange i Kigali: Uruhare rwa Car Free Day mu Guhindura Ubuzima bw’Abaturage.
Kuri iki cyumweru, Abanyakigali bazindukiye mu bikorwa bya siporo rusange izwi nka Car Free Day, igikorwa kimaze kumenyerwa nk’umuco mwiza mu mujyi wa Kigali no mu Rwanda muri rusange. Iki gikorwa kibera mu mihanda imwe n’imwe y’umujyi wa Kigali ifungwa mu gihe runaka kugira ngo abaturage babone umwanya wo gukora siporo batikanga imodoka cyangwa urusaku rw’ibinyabiziga.
Car Free Day ni iki?
Car Free Day ni igikorwa cyatangijwe mu Rwanda mu rwego rwo guteza imbere ubuzima bwiza, guhanga umuco w’imyidagaduro no kurwanya indwara zituruka ku bukeya bw’imyitozo ngororamubiri. Iki gikorwa kiba kabiri mu kwezi, ku cyumweru cya mbere n’icya gatatu. Gitegurwa ku bufatanye bw’inzego zitandukanye z’ubuyobozi, cyane cyane Umujyi wa Kigali n’Ikigo cy’Igihugu cy’Ubuzima (RBC).
Ibikorwa bigize Car Free Day:
- Imyitozo ngororamubiri rusange: Abitabiriye bahurira ku bibuga byateganyijwe bagakora imyitozo ngororamubiri itandukanye iyobowe n’abatoza babigize umwuga.
Gusiganwa mu kwiruka no gutwara amagare: Bamwe bifashisha amagare cyangwa bakiruka mu mihanda igenewe ibi bikorwa.
- Ibikorwa by’ubuzima: Muri Car Free Day, abitabiriye baboneraho kugenzura ubuzima bwabo ku buntu, harimo gupimwa umuvuduko w’amaraso, isukari mu maraso, n’ibindi.
- Imyidagaduro: Nyuma ya siporo, hakurikiraho ibikorwa by’imyidagaduro birimo umuziki n’imikino.
Uko iminsi ishira ni ko imikino ifasha abantu gukora siporo zitandukanye yiyongera, dore ko kuri iyi nshuro hatangijwe undi mushya uzajya ufasha abantu gusiganwa mu modoka mu buryo bw’ikoranabuhanga (E-Sports Simulator).
Ibyiza bya Siporo Rusange ya Car Free Day
- Kugira ubuzima buzira umuze: Siporo igabanya ibyago byo kurwara indwara z’umutima, diyabete, umubyibuho ukabije, n’izindi ndwara zituruka ku bukeya bw’imyitozo ngororamubiri.
- Guhuza abantu: Iki ni igihe abantu b’ingeri zose bahurira, bakamenyana, bagasabana ndetse bakarushaho kunga ubumwe.
- Kurwanya imyuka ihumanya: Kuba imodoka zihagarikwa mu gihe runaka bituma habaho kugabanya imyuka yangiza ikirere, bityo hakongera umwuka mwiza.
- Kuzamura umuco wa siporo: Car Free Day yatumye benshi bamenya akamaro k’imyitozo ngororamubiri, kandi igatera benshi kugira uwo muco buri munsi.
Kuki Abantu Bakwiye Kwitabira Car Free Day?
- Ni uburyo bworoshye bwo kubungabunga ubuzima bwiza: Ntibisaba ibikoresho bihenze, ahubwo ni ugufata umwanya ukifatanya n’abandi.
- Gushyigikira ibikorwa by’umujyi wa Kigali: Kwitabira Car Free Day ni ugushyigikira gahunda ya Leta yo guteza imbere ubuzima n’imiturire myiza.
- Gufasha mu kurengera ibidukikije: Imodoka nyinshi zihagarara, bityo bigafasha kugabanya ubushyuhe n’ubwanduranya bukomoka ku myuka ihumanya.
- Ni uburyo bwo kwidagadura: Uretse imyitozo, ni umwanya wo kwishima, gusabana n’umuryango n’inshuti.
Car Free Day ni urubuga rwiza rwo guhuza siporo, ubuzima bwiza n’umuco wo kurengera ibidukikije. Iyi gahunda igenda ikundwa cyane n’abaturage kubera uruhare rwayo mu guteza imbere imibereho myiza n’ubuzima buzira umuze.
