Umuhanzi wo muri Uganda, Ziza Bafana, yatangaje ko nyakwigendera Mowzey Radio yari afite umugambi wo gushinga ‘label’ ye bwite mu Rwanda mbere y’uko yitaba Imana mu 2018.
Mu kiganiro yagiranye n’itangazamakuru, Bafana yavuze ko Radio yari amaze igihe atekereza gutangirira urugendo rushya rw’umuziki mu Rwanda, aho yashakaga kubaka ibikorwa bye bwite birimo na ‘label’ yise Angel Music.
Uyu muhanzi yavuze ko Radio yari amaze kurambirwa uburyo inganda z’umuziki muri Uganda zakoragamo muri icyo gihe, bityo akifuza kugerageza amahirwe ahandi hashobora kumuha icyerekezo gishya.
Bafana, wakoranye na Radio mu ndirimbo “Byagana”, yavuze ko icyo gihe yari amaze kubona ko Radio afite gahunda yo kwagura ibikorwa bye birenze kuba umuhanzi usanzwe, ahubwo agashaka no kwinjira mu bijyanye no gutunganya no guteza imbere abandi bahanzi.
Ati: “Twakoranye indirimbo nyinshi muri icyo gihe. Radio yari umuhanga cyane mu gutunganya indirimbo no gushyiramo amajwi meza. Hari n’indirimbo nifuzaga ko dusohora cyane. Icyo gihe namusanze ari kumwe na mushiki we bambwira ko bafite umugambi wo kwimukira mu Rwanda.”
Bafana yavuze ko Radio yakundaga cyane uko yabonaga umuziki wo mu Rwanda uteye imbere, ndetse akabona ari ahantu hashobora kumuha amahirwe yo gutangiza ibikorwa bye mu buryo bwisanzuye.
Yavuze ko Radio yari afite icyifuzo cyo gushinga ‘label’ ye bwite yise Angel Music, igamije kumufasha kwihangira inzira nshya mu muziki ndetse no gukorana n’abahanzi batandukanye mu karere.
Ati: “Radio yashakaga indi ntera nshya. Ntekereza ko yari yamaze kubona n’ubutaka mu Rwanda aho yashakaga gutura. Yifuzaga gukora ibintu ku rwego rwo hejuru kurushaho.”
Nyakwigendera Mowzey Radio wari umwe mu bagize itsinda Goodlyfe Crew yitabye Imana mu 2018, nyuma y’imvune yagize mu mutwe.
Uyu muhanzi azwi cyane mu ndirimbo nyinshi zakunzwe mu karere ka Afurika y’Iburasirazuba, by’umwihariko izo yakoranye na mugenzi we Weasel Manizo.
Nubwo atabashije kugera ku nzozi ze zo kwimukira mu Rwanda no gutangiza ‘label’ ye bwite, amagambo ya Ziza Bafana agaragaza ko Radio yari afite umugambi mugari wo kwagura ibikorwa bye no gushaka amahirwe mashya mu muziki.
Ibi kandi bigaragaza ko yari umuhanzi wahoraga ashaka gutera indi ntambwe mu rugendo rwe rwa muzika, ndetse akanatekereza uburyo bwo kubaka izina rye ku rwego mpuzamahanga.
