Umunyarwanda Aminu Hassan Iradukunda, uzwi ku izina rya Creative Aminu, uri gukorera ibikorwa bye by’umuziki mu Budage, akomeje kumenyekana ku rwego mpuzamahanga kubera uruhare rwe mu gutunganya ibikorwa bikomeye by’imyidagaduro n’imuziki bibera mu Burayi.
Uyu musore ukora akazi ko kuyobora no guhanga uburyo amashusho y’ibikorwa by’imyidagaduro akorwa (Creative Director), amaze kubaka izina rikomeye mu bijyanye no gukora filime n’amashusho agaragaza ibitaramo n’ibindi bikorwa by’imyidagaduro.
Yakoranye n’abahanzi bakomeye
Mu rugendo rwe, Aminu amaze gukorana n’abahanzi bakomeye ku Isi barimo Diamond Platnumz, Rema, Tay C na Dadju.
Ibikorwa bye birimo gufata no gutunganya amashusho y’ibitaramo bikomeye, gukora filime zigaragaza ibikorwa by’imyidagaduro ndetse no gukurikirana ibirori n’ibindi bikorwa biba byitabiriwe n’imbaga nyamwinshi.
Ibi byatumye abarirwa mu rubyiruko rw’abahanga mu bijyanye no guhanga no gutunganya amashusho bari kugenda bagira ijambo ku rwego mpuzamahanga.
Aminu kandi yagize uruhare mu kuyobora ibikorwa byo gutunganya amashusho mu iserukiramuco rikomeye rya Afroland, ribera mu Budage rigahuza abahanzi batandukanye b’injyana ya Afrobeats. Muri iri serukiramuco hamaze kuririmbamo abahanzi barimo Victony, C Kay na Libianca.
Si ibyo gusa, kuko yanabaye umuyobozi w’itsinda rishinzwe gutunganya amashusho mu iserukiramuco rikomeye rya Hip-Hop mu Budage. Iri serukiramuco ryitabirwa n’abahanzi mpuzamahanga barimo Wiz Khalifa na Rich The Kid, aho Aminu yari ashinzwe kugenzura uko amashusho afatwa ku rubyiniro rutandukanye.
Aminu yavuze ko kuba ari mu bagira uruhare muri ibi bikorwa ari iby’agaciro kuri we, ashimangira ko abona ejo hazaza he ari heza mu bijyanye n’ibyo akora.
Ibikorwa bye ntibigarukira ku myidagaduro
Uretse mu muziki n’ibitaramo, Aminu yanagize uruhare mu bikorwa bya United Dance Organisation (UDO) aho yakoraga nk’umuyobozi w’ikorwa ryo gufata amashusho mu marushanwa mpuzamahanga y’imbyino.
Muri uru rwego, yari ashinzwe kuyobora amatsinda afata amashusho y’ababyina ndetse no gutunganya ibikoreshwa mu kumenyekanisha ayo marushanwa.
Aminu kandi akorana n’abatoza n’abajyanama b’ubuzima (life coaches) baba mu Budage, abafasha gukora amashusho akoreshwa mu mahugurwa, ibiganiro byo kuri internet ndetse n’ibindi bikorwa byifashisha ikoranabuhanga.
Uburyo akoramo buhuza ubuhanga bwo gukora amashusho asa nk’afilimi n’ubumenyi mu kwamamaza, bikafasha ibigo n’abantu bakorana kugera ku bantu benshi.
Urugendo rutanga isomo ku rubyiruko
Aminu Iradukunda akomoka mu Rwanda, ariko yubatse izina rye binyuze mu gukorana n’abandi, kwiga ubuhanga bushya no gukoresha neza amahirwe yabonye.
Urugendo rwe rugaragaza uburyo Abanyafurika bari kugenda bagira uruhare rugaragara mu itangazamakuru mpuzamahanga n’inganda z’imyidagaduro.
Abinyujije ku mbuga nkoranyambaga ze, Aminu akomeje gutanga isomo no gukangurira urubyiruko rufite inyota yo kwiga gukora filime, gutunganya amashusho no guhanga ibihangano.
Kugeza ubu, kubera ubunararibonye afite mu gukorana n’abahanzi mpuzamahanga, kuyobora ibikorwa by’iserukiramuco rinini ndetse no gutunganya amashusho y’ibikorwa bitandukanye, Aminu akomeje kwagura ibikorwa bye mu rwego rw’imyidagaduro no mu bijyanye no guhanga ibihangano
