Ukwezi kw’igisibo cya Ramadhani mu mwaka wa 2026 kuzatangira tariki ya 17 Gashyantare ku bihugu bimwe, naho ahandi tariki ya 18 Gashyantare. Igisibo, kimwe mu nkingi eshanu z’idini ya Islamu, gisaba abayisilamu kwiyiriza ubusa kuva izuba rirasohoka kugeza rirengereye, iminsi 29 cyangwa 30.
Itandukaniro ry’igihe cyo kwiyiriza ubusa rishingiye ku latitude, ikirere n’igihe cy’umwaka. Mu bice by’amajyaruguru y’Uburayi n’uturere twa Arctique, izuba rimara igihe kirekire mu mpeshyi, bigatuma igisibo kiramba. Mu mijyi nka Tromso muri Noruveje, igihe cyo kwiyiriza ubusa kizagera ku masaha 22 ku munsi, Reykjavik – Isilande amasaha 19, Murmansk – Uburusiya na Stockholm – Suwede amasaha arenga 18.
Mu bihugu byo mu majyepfo ya equator, igisibo kizaba kigufi. Aha twavuga Ushuaia – Argentine (amasaha 11), Punta Arenas – Chili (amasaha 11), Christchurch – Nouvelle-Zélande (amasaha 11), na Cape Town – Afurika y’Epfo (amasaha 12). Ibihugu biri hafi ya equator nka Abuja – Nigeria, Jakarta – Indoneziya, Kuala Lumpur – Maleziya na Nairobi – Kenya, biziyiriza ubusa hagati y’amasaha 12 na 13.
Uburyo bwo gutangira no gusoza igisibo bushingira ku kirere, latitude, ndetse no ku kalendari y’ukwezi kwa Islamu. Nubwo igihe gitandukana, Ramadhani ni ukwezi abantu bose biyiriza bagakomeza gusenga no gukomeza ukwiyunga n’Imana.
Kwiyiriza ubusa bikwiye ku muntu ugeze ku myaka 14, ufite ubuzima bwiza, utarwaye indwara zidakira cyangwa zibuza kwiyiriza ubusa, ndetse n’abatagira impamvu zifatika zo kutabikora. Abagore batwite cyangwa bonsa bashobora kubireka igihe bibatera ikibazo, kimwe n’abagenzi bari mu rugendo rurerure.
Ramadhani 2026 izerekana ukuntu imiterere y’ikirere n’uburebure bw’amasaha y’izuba bigira uruhare mu gusobanura uburyo igisibo gikorwa ku isi hose, kikanongera ubumwe n’imbaraga mu kwizera abayisilamu.
