Uruganda rw’ibiribwa n’ibinyobwa rwa Nestlé rwatangaje ko rwakuye ku isoko mpuzamahanga bimwe mu bicuruzwa by’amata y’abana kubera impungenge z’uko bishobora kuba birimo ubumara (toxin) bwateza uburozi mu biribwa (food poisoning).
Nestlé yavuze ko bimwe mu byiciro (batches) by’amata y’abana ya SMA, n’amata y’abana akurikiraho (follow-on formula) bidakwiye guhabwa abana.
Nestlé yavuze ko ibyo byiciro byagurishijwe mu bihugu bitandukanye ku isi, kandi bishobora kuba birimo ubumara bushobora gutera isesemi no kuruka iyo bwinjiye mu mubiri.
Iki kigo cyongeyeho ko nta raporo yemejwe y’indwara yatewe n’ibyo bicuruzwa iraboneka, ariko kikabikura ku isoko mu rwego rwo kwitwararika no kwirinda ingaruka zose zishoboka.
Mu itangazo cyagize kiti: “Turasaba imbabazi tubikuye ku mutima ku mpungenge cyangwa imbogamizi, byaba byateye ababyeyi, abita ku bana cyangwa se n’abakiriya bacu.
“Umutekano n’imibereho myiza y’abana bato ni byo dushyira imbere kurusha byose”.
Uru ruganda ruvuga ko ari rwo runini ku isi mu gukora ibiribwa n’ibinyobwa rwemereye itangazamakuru ko uko kugarurwa kw’ibicuruzwa (recall) kwakozwe ku rwego mpuzamahanga.
Bashimangiye ko ibindi bicuruzwa byose bya Nestlé n’andi matsinda (batches) y’ibi bicuruzwa atasubijwe ku ruganda, byo nta kibazo bifite kandi abantu bakwiye gukomeza kubyizera ndetse bakabikoresha nta mpungenge.
Uru ruganda rukorera henshi ku isi rufite icyicaro gikuru mu Busuwisi rukora ibintu byinshi biribwa n’ibinyobwa kandi bigurishwa ku masoko henshi ku isi, harimo n’amoko menshi y’amata y’abana.
Nestlé yemeye gusubiza amafaranga abakiriya baguze ibyo bicuruzwa, inavuga ko ikibazo cyatewe na kimwe mu bibigize (ingredient) cyatanzwe n’umwe mu basanzwe babibaha (supplier).
Nestlé mu Bufaransa yatangaje ko irimo “gusaba abaguze ibyo bicuruzwa byabo, kubisubiza ku bushake, mu rwego rwo kwirinda ibibazo” ku matsinda amwe n’amwe y’amata y’abana bayo ya Guigoz na Nidal.
Mu Budage, ayo mata y’abana azwi ku mazina ya Beba na Alfamino.
Nomero za batch z’ibicuruzwa byagize ikibazo ziboneka ku rubuga rwa Nestlé.
Abakiriya barasabwa kugenzura kode ijyanye n’iyo batch iba mu ndiba y’igikombe n’inyuma ku ikarito ndetse no ku ruhande rw’icupa ibyo bicuruzwa bipfunyitsemo.
Ibyo bicuruzwa byabonetsemo ‘cereulide’ ikinyabutabire cy’ubumara butica ariko bushobora kugira ingaruka mbi iyo bugeze mu mubiri.
‘Cereulide’ ni ubumara bukorwa na zimwe muri Bacillus cereus, ubwoko bwa bagiteri bushobora gutera indwara ziterwa n’ibiribwa byanduye.
Ibi bimenyetso bishobora kugaragara vuba kandi birimo kuruka no kubabara mu nda.
Ikigo gishinzwe umutekano w’ibiribwa (Food Standards Agency – FSA) cyaburiye ko ‘cereulide’ idapfa byoroshye kandi ko idashobora kwicwa no guteka, cyangwa gukoresha amazi ashyushye, igihe hategurwa amata y’abana.
Umukuru w’ishami rishinzwe gukurikirana ibibazo byihutirwa muri FSA, Jane Rawling, yavuze ko ababyeyi n’abarera abana batagomba kugaburira impinja cyangwa abana bato ibicuruzwa byavuzwe ko bifitweho impungenge.
Yongeyeho ati: “Ndashaka guhumuriza ababyeyi, abarera abana n’abandi bose ko turimo gufata ingamba zihutirwa, tugafasha kwemeza ko ibicuruzwa byose byagaragayeho ikibazo bikurwa ku isoko mu rwego rwo kurinda abana n’abandi babikoresha.
“Niba waragaburiye iki gicuruzwa umwana muto kandi ukaba ufite impungenge ku ngaruka zishobora kuba ku buzima bwe, ugomba kugisha inama abashinzwe ubuzima uhamagara muganga wawe.”
