Munyanshoza Dieudonne uzwi cyane nka Mibirizi, ni umwe mu bahanzi bafite izina rikomeye mu muziki nyarwanda, by’umwihariko mu ndirimbo zafashije Abanyarwanda mu rugendo rwo kwiyubaka no gukira ibikomere byatewe na Jenoside yakorewe Abatutsi mu 1994. Uretse kuba umuhanzi, azwi kandi nk’umwanditsi w’indirimbo ndetse n’umutahira ufite ubuhanga mu by’amazina y’inka.
Amateka ye akiri muto
Munyanshoza Dieudonne yavukiye i Mibilizi mu cyahoze ari Komine Kimbogo, ubu ni mu Karere ka Rusizi mu Ntara y’Iburengerazuba, tariki ya 25 Nzeri 1975. Ni umwana wa Munyanshoza Anaclet na Mukarugema Mariya.
Nubwo atagize amahirwe yo gukomeza amashuri menshi, kuko yarangije amashuri abanza gusa, akiri muto yagaragazaga impano mu muziki. Mu mashuri abanza yakundaga kuririmba indirimbo z’abahanzi bakunzwe icyo gihe barimo Sebanani Andereya na Niyomugabo Philemon.
Mu 1989, nyuma yo gusoza amashuri abanza, yize umwuga w’ububaji ku kigo cy’i Kibogora muri Nyamasheke, umwuga yakomeje gukora mbere yo kwinjira mu gisirikare.
Uko yinjiye mu ngabo za FPR Inkotanyi
Mu mwaka wa 1993, Munyanshoza yinjiye mu ngabo za FPR Inkotanyi afite imyaka 18 y’amavuko. Yinjiriye ahahoze ari Komine Butaro, ubu ni mu Karere ka Burera hafi y’umupaka w’u Rwanda na Uganda.
Nubwo yari yinjiye mu gisirikare, impano y’umuziki yakomeje kumugaragaramo. Muri icyo gihe yatangiye kwandika no kuririmba indirimbo ze bwite, zirimo izakunzwe nka “Urukundo Ruzira Icyasha” na “Horana Ubutwari.”
Nyuma y’urugamba rwo kubohora igihugu no guhagarika Jenoside yakorewe Abatutsi mu 1994, Mibirizi yongeye kwinjira byimbitse mu muziki, aho indirimbo ze zatangiye gufasha benshi mu rugendo rw’isanamitima.
Urugendo rwe mu muziki
Mu 1997, Mibirizi yasohoye album ye ya mbere yari iriho indirimbo zitandukanye zirimo “Umwari,” “Umunsi Wandutiye Iyindi,” “Amazi si ya Yandi,” “Urukundo Ruzira Icyasha,” na “Amahoro Meza.”
Mu 1999 yasohoye album ya kabiri igizwe n’indirimbo zo Kwibuka Jenoside yakorewe Abatutsi. Zimwe mu zamenyekanye cyane harimo “Mibilizi,” “Nyanza ya Butare,” “Ku Mugote,” “Twarabakundaga,” na “Jenoside Ntikagaruke.” Nyuma y’iyi album yakomeje gukora izindi ndirimbo nyinshi zigamije kwibuka no guha icyubahiro abazize Jenoside.
Mu 2010 yasohoye indi album igaruka ku ndirimbo z’urukundo n’izikoreshwa mu birori by’ubukwe, zirimo “Mubaye Umwe,” “Nibaguhigamire,” n’iyitwa “Umwari.”
Yanakoranye indirimbo n’abandi bahanzi mu bikorwa byo kwibuka Jenoside yakorewe Abatutsi, zirimo “Nturi Wenyine,” ndetse anasohora izindi nka “Bisesero,” “Gisagara,” na “Jali.”
Ibihembo n’ishimwe yahawe
Mu rugendo rwe mu muziki, Mibirizi yagiye ahabwa ibihembo bitandukanye bishimangira uruhare rwe mu muziki nyarwanda.
Mu 2009 yahawe igihembo cyo kurwanya Sida cyatanzwe n’Ikigo cy’Igihugu gishinzwe ibidukikije (REMA) kubera indirimbo “Amazi si ya Yandi.”
Mu 2011 yabaye uwa kabiri mu marushanwa yo guhanga indirimbo yateguwe na Minisiteri y’Ubucuruzi n’Inganda (MINICOM) yitwaga “Hanga Umurimo,” aho yahembwe miliyoni imwe y’amafaranga y’u Rwanda.
Mu 2024 kandi yahawe igihembo cy’icyubahiro muri Isango na Muzika Awards, mu rwego rwo kumushimira uruhare rwe mu iterambere ry’umuziki nyarwanda.
Ubuzima bwe bwite
Munyanshoza Dieudonne yakoreye igihe kirekire mu ngabo z’u Rwanda mbere yo kujya mu kiruhuko cy’izabukuru mu 2016, nyuma y’imyaka 23 mu gisirikare, afite ipeti rya Sergeant.
Mu buzima busanzwe, ni umugabo wubatse. Yashakanye na Kayishema Candide mu 2009, nubwo bari baramenyanye kuva mu 2007. Bombi bafitanye abana batanu, abakobwa bane n’umuhungu umwe.
Uyu muhanzi akomeje gufatwa nk’umwe mu bagize uruhare rukomeye mu gukoresha umuziki nk’igikoresho cy’isanamitima n’ubumwe bw’Abanyarwanda.
