Ikigo Talent Africa Group ku bufatanye na Abeeka Band batangaje ibiciro by’amatike y’igitaramo gikomeye cyiswe “Roots & Vibes Concert” giteganyijwe kubera mu mujyi wa Kampala ku wa 2 Gicurasi 2026.
Abategura iki gitaramo batangaje ko itike isanzwe (Ordinary) izagura amashiringi ya Uganda 50,000, mu gihe ameza ya VIP azagura amashiringi ya Uganda 3,000,000, aho abazayahitamo bazahabwa uburyo bwihariye bwo kwishimira iki gitaramo mu buryo buhanitse.
“Roots & Vibes Concert” igamije guhuza injyana zitandukanye zirimo Reggae, Soca, Afro-roots na Dancehall, mu rwego rwo guteza imbere umuco n’imyidagaduro ihuza Afurika n’akarere ka Caribbean.
Abategura iki gitaramo bavuga ko kizaba ari ijoro ryihariye rizagaragaramo umuziki w’imbona nkubone n’ibirori byuje umwuka w’umuco.
Iki gitaramo kizaba kiyobowe na Abeeka Band, itsinda ry’abahanzi batanu rimaze kwamamara muri Afurika y’Iburasirazuba kubera imbaraga bagaragaza ku rubyiniro n’indirimbo zabo zigezweho.
Aba bahanzi bagizwe na Pages, Kevin, Michael, Producer Allan na Dr. Tre, bakaba bazwi mu kuvanga injyana zirimo Afro-pop, R&B n’izindi njyana zigezweho.
Abeeka Band imaze kubaka izina rikomeye mu bakunzi b’umuziki, by’umwihariko mu rubyiruko no mu bakunda ibitaramo bya live, ibintu bituma batoranywa nk’abazayobora iki gitaramo cyitezweho guhuza abantu benshi bakunda umuziki n’umuco.
Abategura Roots & Vibes – Live in Kampala bavuga ko iki gitaramo cyateguwe mu buryo bwihariye hagamijwe gushyira imbere umuziki w’umwimerere, ikirere cyiza cy’imyidagaduro ndetse no kugaragaza inkuru z’umuco binyuze mu muziki.
Biteganyijwe ko mu minsi iri imbere hazatangazwa aho amatike azagurirwa, aho abakunzi b’umuziki basabwe gukomeza gukurikirana imbuga za Talent Africa Group kugira ngo batange amakuru mashya.
Iki gitaramo gitegerejwe n’abatari bake, kuko biteganyijwe ko kizitabirwa n’abakunzi b’umuziki baturutse mu bice bitandukanye by’akarere, bikomeza gushimangira Kampala nk’umujyi uri kwigaragaza mu kwakira ibitaramo n’ibikorwa by’umuco ku rwego mpuzamahanga.
