Umuhanzi wo muri Uganda, Geosteady, yamaganye amagambo yahoze ari umukunzi we, Prima Kardashi, wavuze ko mu myaka umunani bamaranye batigeze basomana.
Ibi byavuzwe na Prima mu kiganiro cya TikTok Live, aho yatangaje ko nubwo babanaga kandi bafitanye abakobwa babiri, ngo batigeze basomana mu gihe cyose bari mu rukundo.
Aya magambo yahise akwirakwira ku mbuga nkoranyambaga, akurura impaka ndende mu bakunzi b’imyidagaduro muri Uganda no hanze yayo.
Mu gusubiza, Geosteady yahakanye ibyavuzwe, avuga ko uko we asobanura umubano wabo bitandukanye cyane n’uko Prima abivuga.
Yagize ati: “Uko nsobanura uwo mubano biratandukanye n’uko Maama awusobanura. Azi kuvuga ikintu uyu munsi, ejo akakivuguruza, akandika ikindi agishyiramo imbaraga. Ntabwo nemera ko ibyo yavuze ari ukuri.”
Uyu muhanzi yagaragaje ko adatewe impungenge n’ayo magambo, ahubwo ko amufata nk’umuntu ukunda kuvuga ibintu bitunguranye ku mbuga nkoranyambaga.
Yongeyeho ko yamaze kumenyera imiterere ya Prima, bityo ko adafata buri jambo rye nk’ikintu gikwiye guteza impaka.
Nubwo aba bombi batandukanye mu rukundo, bakomeje gufatanya kurera abana babo mu buryo bwumvikana.
Abakurikiranira hafi ubuzima bwabo bavuga ko nubwo amagambo yabo akunze gutuma havuka impaka, ku bijyanye n’abana babo bagaragaza ubufatanye.
Iyi nkuru yongeye kwerekana uko imbuga nkoranyambaga zikomeje kuba urubuga rwo kugaragarizaho ibibazo by’abanyamuziki n’ibyamamare, aho amagambo avugiwe mu buryo busanzwe ashobora guteza impaka zikomeye mu ruhame.
