U Rwanda ruzakira irushanwa mpuzamahanga ry’imikino ya gicuti ryagutse rya FIFA Series 2026, rizabera i Kigali kuva ku wa 26 kugeza ku wa 31 Werurwe 2026.
Imikino izabera kuri Stade Amahoro na Kigali Pelé Stadium, aho amakipe azaba agabanyije mu matsinda abiri, arimo u Rwanda, Kenya, , Estonia, na Grenada biri mu itsinda A , ndetse na Tanzania Aruba, Macau na Liechtenstein mu itsinda B.
FIFA Series ni rishanwa ki?
Irushanwa rya FIFA Series ni imikino ya gicuti ihuza amakipe y’ibihugu aturuka mu mashyirahamwe atandukanye y’umupira w’amaguru ku Isi, asanzwe adakunze kubona amahirwe yo guhura.
Intego nyamukuru ya FIFA Series ni uguteza imbere imikoranire mpuzamahanga mu mupira w’amaguru, bigatanga umusanzu ugaragara mu iterambere ryawo ku rwego rw’isi.
Muri iri rushanwa rya 2026, hazitabira amakipe y’ibihugu 48, bingana hafi na kimwe cya kane cy’ibihugu 211 bigize FIFA. Aya makipe azahatanira mu matsinda 12, buri tsinda rigizwe n’amakipe ane.
Amatsinda abiri muri yo (A&B) ni yo u Rwanda ruzakira, aho itsinda A u Rwanda rurimo rizakinira kuri Stade Amahoro, naho itsinda B rigakinira kuri Kigali Péle Stadium.
Imyiteguro y’Ikipe y’Igihugu (Amavubi)
U Rwanda ruzatangira rukina na Grenada ku wa 27 Werurwe 2026, mu mukino uzabera kuri Stade Amahoro saa tatu z’ijoro.
Ishyirahamwe ry’Umupira w’Amaguru mu Rwanda (FERWAFA) ryamaze gushyira hanze urutonde rw’agateganyo rw’abakinnyi bazitabira iri rushanwa.
Ni irushanwa u Rwanda rugiye gutangirana n’umutoza mushya, Stephen Constantine, wamaze guhamagara abakinnyi 31 barimo n’amasura mashya ariko kandi batarimo abo benshi bifuzaga.
Abarimo Samuel Gueulete ndetse na Hakim Sahabo bataherukaga guhamagarwa bongeye kugirirwa icyizere, mu gihe umuzamu wa Rayon Sports, Kwizera Olivier byari byitezwe ko yakongera kugaruka mu Mavubi, atahamagawe. Icyakora ku busabe bwa Perezida wa FERWAFA ashobora kongerwamo.
Ikipe izaba isa n’aho ari nshya kuko izagaragaramo amasura mashya. Aha twavuga nk’abakinnyi bakina hanze y’u Rwanda biganjemo abo ku mugabane w’Uburayi barimo Kalisa Sven [FC Etzella Ettelbruck] ukina hagati.
Hari kandi ba rutahizami Mickels Joy Slayd [FK KARVAN], Ndayishimiye Karl Matteo [KVC WILRIJK], Mickels Leroy Jacques [Zira FC], ndetse naKury Johan Marvin [AC BELLINZONA.
Ntitwakwibagirwa n’Abanyarwanda bakiri bato nka Uwumukiza Obed na Uwineza Jean Rene na bo bahamagawe mu ikipe y’Igihugu.
Kuki u Rwanda rwakaniye cyane imikino ya FIFA Series?
Impamvu ya mbere ni ukuzamura amanota (FIFA Ranking). Iyi mikino itanga amahirwe yo gukina n’amakipe yo mu bindi bice by’isi (nk’Estonia cyangwa Grenada), bityo gutsinda bikaba byafasha Amavubi kuzamuka mu nzego z’isi.
Amavubi akeneye kwipima bundi bushya nyuma y’ibihe bitari byiza mu yandi marushanwa.
Muri rusange, imibare n’umusaruro by’Amavubi muri uyu mwaka ushize wa 2025 ntabwo byashimishije abafana, ari na yo mpamvu bashaka kwiyunga na bo muri FIFA Series.
Mu gushaka itike y’Igikombe cy’Afurika cy’ibihugu cya 2025, Amavubi ntiyashoboye kwerekeza muri Maroc kuko yasezerewe atabonye itike mu itsinda ryarimo Nigeria, Benin, na Libya. Gutsindwa na Benin na Libya mu mikino yo kwishyura ni byo byaciye intege abafana.
Mu gushaka itike y’Igikombe cy’Isi cya 2026, n’ubwo batangiye neza abasore b’Amavubi batsinda Afurika y’Epfo (2-0) mu mpera za 2023, u Rwanda rwagize umusaruro nkene mu mikino yakurikiyeho muri 2024, bityo amahirwe yabo akomeza kugabanuka ndetse baza no gusezererwa mu Itsinda.
Icyo iyi FIFA Series isobanuye ku ikipe y’igihugu Amavubi
Iyi mikino ni nk’uburyo bwo “Kwiyunga n’Abafana”, aho nyuma yo gusezererwa mu gushaka itike y’Igikombe cy’Isi, batsinze Grenada cyangwa Estonia muri iyi mikino ya FIFA Series byagarura icyizere mu bafana cyane ko bazaba bakinira kuri Sitade Amahoro nshya ivuguriye ndetse bari mu rugo.
U Rwanda rwiteguye rute nk’Igihugu cyakiriye Irushanwa Mpuzamahanga??
Mu Rwanda imyiteguro igeze kure mu nzego zitandukanye haba ibibuga, amakipe, ndetse n’uburyo bwo korohereza abafana gukurikira iyi mikino.
Stade Amahoro izakira imikino yo mu Itsinda A ririmo u Rwanda, Kenya, Estonia, na Grenada. Iyi stade yari imaze iminsi ifunzwe kugira ngo itunganywe neza ikurikije amabwiriza ya FIFA.
Ni mu gihe Kigali Péle Stadium izakira imikino yo mu itsinda B, na yo yatunganyijwe ndetse ikongerwamo insakazamashusho zamamarizwaho zigaragara ku mpande z’ikibuga.
Hanakemuwe ikibazo cy’amashanyarazi cyari cyimaze iminsi kihagaragara byanayumaga imikino itaba mu masaha y’ijoro.
Ishyirahamwe ry’Umupira w’Amaguru mu Rwanda (FERWAFA) ryashyizeho uburyo bworoshye bwo kugura amatike n’udushya tugamije gukurura abafana.
Amatike asanzwe (Upper & Lower Bowl) agura 2,000 RWF, naho imyanya y’icyubahiro (VIP) ikagura hagati ya 5,000 RWF na 30,000 RWF. Abafana bashobora gukoresha telefone banyuze kuri *939*3*2# cyangwa bagasura urubuga rwa SportsPass.
