Umuhanzi w’Umunyarwanda, Itahiwacu Bruce wamenye nka Bruce Melodie ari mu Mujyi wa Paris mu Bufaransa aho yamaze gukorana indirimbo nshya na mugenzi we w’Umunya-Nigeria, Oxlade, wamamaye mu ndirimbo nka ‘Ku lo sa’.
Impinga, yamenye ko Bruce Melodie yerekeje mu Bufaransa nyuma yo gutaramira mu Bubiligi ku wa 7 Werurwe 2026 mu gitaramo yahuriyemo na Sheebah Karungi wo muri Uganda.
Intego ye yari ukureba amahirwe yo gufata amashusho y’indirimbo ze nshya zigize Album ye nshya iri ku rwego mpuzamahanga ndetse no gukorana na Oxlade mu ndirimbo nshya.
Ni ubwa mbere aba bahanzi bahuriye mu ndirimbo, aho bitezweho guhuza umuziki wabo mu buryo bwagutse ku isoko mpuzamahanga.
Bruce Melodie akomeje kugaragaza ko intego ye ari ukuzamura umuziki we ku rwego rw’isi, binyuze mu gukorana n’abahanzi b’icyitegererezo ku mugabane wa Afurika no ku isi hose.
Oxlade, ni umwe mu bahanzi bashya ba Afrobeat bagaragaje impano idasanzwe mu myaka micye ishize. Izina rye nyakuri ni Ikuforiji Olaitan Abdulrahman, ariko ku rubyiniro no ku bafana, yamenyekanye nka Oxlade.
Oxlade yatangiye kumenyekana mu 2018 ubwo yafatanyaga n’abandi bahanzi bo muri Nigeria, bituma indirimbo ze zirushaho kugera ku bantu benshi.
Indirimbo ze zamenyekanye cyane zirimo Away, Ojuju, Kulosa, na Hold On, aho zigaragaza ubuhanga bwe mu guhuza amajwi meza n’umutima w’indirimbo.
Ni umuhanzi wihariye kuko akunda gukorana n’abandi bo ku rwego mpuzamahanga, ibintu byatumye umuziki we ugera kure mu bihugu byo muri Afurika no hanze yayo.
Uruhare rwe mu muziki rwibanda ku ndirimbo zifite ubutumwa bw’urukundo, ubuzima bwa buri munsi n’ibyishimo, bityo abakunzi be bakamufata nk’umwe mu bahanzi bashoboye gutanga amarangamutima binyuze mu njyana ye.
Kubera ubuhanga bwe, Oxlade amaze kuba ikimenyabose mpuzamahanga, aho abafana be bamukurikira cyane mu bihugu nka Afurika y’Epfo, Ubufaransa, Amerika n’ahandi.
Ubu kandi aragenda yifatanya n’abahanzi bo muri Afurika n’isi yose, aho intego ye ari ugutanga umuziki ufite umwimerere kandi uhuza imitima y’abantu.
Mu gihe gito amaze ku rubyiniro mpuzamahanga, Oxlade yerekanye ko ari umwe mu bahanzi b’icyitegererezo, uhuriza hamwe ubuhanga, ibihangano byiza n’ubushobozi bwo gutuma umuziki we ugera ku rwego rw’isi.
Ni muri urwo rwego ubu afatanyije n’umuhanzi w’Umunyarwanda, Bruce Melodie uri mu Bufaransa, bahuriye mu ndirimbo nshya itegerejwe cyane n’abakunzi b’umuziki wa Afrobeat n’uw’u Rwanda.
