Abahanzi b’indirimbo zo kuramya no guhimbaza Imana bazwi ku rwego mpuzamahanga, Todd Galberth na Naomi Raine, batangaje ko u Rwanda ruri mu bihugu bazasura mu rugendo rwabo rw’isi bise “Everywhere World Tour”, rugamije kugeza umuziki wo kuramya Imana ku bakunzi babo hirya no hino ku migabane itandukanye.
Uru rugendo ruzatangira mu ntangiriro za Werurwe, rukazenguruka imijyi irenga icumi yo ku Isi, harimo u Burayi, Afurika na Ositaraliya. Ku mugabane wa Afurika, u Rwanda ruri ku rutonde rumwe n’ibihugu nka Zambia, Zimbabwe, Uganda na Afurika y’Epfo.
Biteganyijwe ko aba bahanzi bazataramira abakunzi babo mu Rwanda ku wa 14 Werurwe, bikaba ari igitaramo gitegerejwe n’abakunzi b’indirimbo zo kuramya Imana mu gihugu.
Uretse Afurika, uru rugendo ruzanyura mu mijyi ikomeye yo mu Burayi irimo Manchester na London mu Bwongereza, ndetse na Amsterdam mu Buholandi. Muri Ositaraliya, Galberth na Raine bazataramira mu mijyi ya Perth, Melbourne na Sydney.
Todd Galberth na Naomi Raine bombi bafatwa nk’abantu bafite uruhare runini mu iterambere ry’umuziki wa gospel wo muri iki gihe, bazwiho guhuza amajwi akomeye, amagambo yimbitse n’ubutumwa bushingiye ku kwizera n’ugusenga.
Mu 2025, bombi bari basuye Zimbabwe bari mu itsinda rya Maverick City Music, imwe mu mitwe ikomeye ku Isi mu muziki wo kuramya Imana. Kugaruka muri Afurika ku rugendo rwabo bwite bigaragaza ko hari icyifuzo n’inyota by’abafana babo kuri uyu mugabane.
Birazwi ko Maverick City Music yari yaratekereje gushyira u Rwanda kuri gahunda y’urugendo rwabo rwo muri Afurika, ariko nyuma irukuramo, aho amakuru yatangajwe n’itangazamakuru avuga ko umuterankunga wo mu Kigali yari yabagiriye inama yo kutahakoresha igitaramo cyabera mu minsi y’imibyizi (mu cyumweru), kuko cyari kutitabirwa cyane.
Abo ni bande?
Todd Galberth ni umuhanzi, umwanditsi w’indirimbo ndetse n’umuyobozi mu kuramya Imana ukomoka muri Leta Zunze Ubumwe za Amerika. Azwi cyane mu ndirimbo zakunzwe n’amatorero menshi ku Isi zirimo After All These Years, Proclaim na Hand of God. Umuziki we uzwiho kuba ufite amagambo akora ku mutima, yuzuyemo ukwizera n’ubutumwa bufasha abawumvaga mu rugendo rwabo rwo kwizera.
Ku rundi ruhande, Naomi Raine ni umuhanzi w’indirimbo za gospel wegukanye igihembo cya Grammy, akaba n’umwe mu bagize itsinda rya Maverick City Music. Yanditse kandi aririmba indirimbo zakunzwe cyane zirimo The Story I’ll Tell, God Will Work It Out na One Name. Azwiho ijwi ryihariye n’uburyo asenga aririmba mu kuri, bikaba byaramugize umwe mu bagize uruhare runini mu guhindura isura y’umuziki wa gospel ku rwego mpuzamahanga.
Gahunda yuzuye y’Everywhere World Tour
- Werurwe 6: Manchester
- Werurwe 7: London
- Werurwe 8: Amsterdam
- Werurwe 11: Zambia
- Werurwe 13: Zimbabwe
- Werurwe 14: Rwanda
- Werurwe 15: Uganda
- Werurwe 19: Johannesburg
- Werurwe 20: Cape Town
- Werurwe 21: Durban
- Werurwe 27: Perth
- Werurwe 28: Melbourne
- Werurwe 29: Sydney
Uku kuza kw’aba bahanzi mu Rwanda gufatwa nk’amahirwe akomeye ku bakunzi b’umuziki wo kuramya Imana, ndetse bikomeza gushimangira uko u Rwanda rugenda ruba igicumbi cy’ibikorwa mpuzamahanga by’imyidagaduro n’umuziki.
