Umukinnyi w’iteramakofe wo muri Algeria, Imane Khelif, yatangaje ko yiteguye gukorerwa isuzuma ry’igitsina (sex test) niba byamufasha kwemererwa kwitabira Imikino Olempike izabera i Los Angeles mu 2028.
Khelif, wegukanye umudali wa zahabu mu bagore mu cyiciro cya ‘welterweight’ (abatarengeje 66 kg) mu Mikino Olempike ya Paris 2024, nyuma yaho yahuye n’ibibazo by’impaka zijyanye n’uko yemerewe guhatana mu cyiciro cy’abagore kandi bikekwa ko yaba afite igitsina gabo.
Mu 2023, we n’umukinnyi wo muri Tayiwani witwa Lin Yu-ting bahagaritswe kwitabira Shampiyona y’Isi n’Ishyirahamwe Mpuzamahanga ry’Iteramakofe (IBA), bavuga ko batatsinze ibizamini by’igitsina bibaha uburenganzira bwo guhatana.
Ariko Komite Mpuzamahanga Olempike (IOC) yaje kwemeza ko Khelif yemerewe guhatana mu Mikino Olempike ya Paris, nyuma y’uko IOC yambuye IBA uburenganzira bwo kuyobora umukino w’iteramakofe muri Kamena 2023.
Muri iyo mikino Olempike Khelif yarushije abo bari bahatanye yegukana umudali wa zahabu, maze impaka ku irangamimerere rye zongera kubura.
Khelif yabwiye CNN ku wa Gatatu ko nta kintu na kimwe afite cyo guhisha, kandi ko yemeye gukurikiza ibisabwa byose bijyanye n’ibizamini, mu gihe byashyirwaho na Komite Mpuzamahanga ya Olempike (IOC).
Yagize ati:”Birumvikana ko nemera gukora ikintu cyose nsabwa gukora kugira ngo mbashe kwitabira amarushanwa.”
Yakomeje agira ati: “Bagomba kurengera abagore, ariko mu gihe barengera abagore, bagomba no kwitondera kudahutaza abandi bagore.”
Khelif, ufite imyaka 26, asanzwe ahatana mu biciro by’abagore.
Yabwiye CNN ati:”Sinahinduye igitsina. Ndi umugore.”
Yongeyeho ati: “Ndashaka kubaho ubuzima bwanjye. Mureke kunkoresha mu nyungu zanyu za politiki.”
Perezida wa Leta Zunze Ubumwe za Amerika, Donald Trump, umwaka ushize yise Khelif “umuteramakofe w’umugabo”, nyuma yo gusinya itegeko ribuza abagore bihinduye igitsina kwitabira amarushanwa y’ibyiciro by’abagore.
Ishyirahamwe rishya ryitwa World Boxing ryahawe icyemezo cy’agateganyo n’IOC muri Gashyantare 2025, nk’urwego mpuzamahanga rugenga umukino w’iteramakofe.
Ryashyizeho itegeko risaba abakinnyi bose gupimwa ibizamini ndangamuntu (genetic) kugira ngo “hagenzurwe igitsina bavukanye n’uburenganzira bwabo bwo guhatana.”
Mu gihe ryatangazaga iryo tegeko, ryavuze ku izina rya Khelif, ariko nyuma riza kubisabira imbabazi.
Khelif yajuririye urukiko mpuzamahanga rw’imikino (Court of Arbitration for Sport – CAS) ku bijyanye n’izo ngamba nshya za World Boxing muri Kanama.
Urubanza rurebana n’iyo ngingo ruracyategereje kuburanishwa.
