Pasika ni umwe mu minsi mikuru ikomeye cyane mu myemerere ya gikristo ku isi. Uyu munsi wizihizwa mu rwego rwo kwibuka izuka rya Yezu Kristu, Abakristo bemera ko yazutse nyuma yo kubambwa no gupfa ku musaraba.
Inkomoko ya Pasika
Amateka ya Pasika ashingiye ku byanditswe muri Bibiliya, cyane cyane mu bitabo by’Ivanjili bivuga ubuzima bwa Yezu. Nk’uko bigaragara muri izo nyandiko, Yezu yabambwe ku musaraba ku wa Gatanu (uzwi nka Good Friday) nyuma y’iminsi itatu arazuka, ku Cyumweru.
Izuka rye rifatwa nk’intsinzi y’ubuzima ku rupfu n’icyizere cy’agakiza ku bemera. Ni yo mpamvu Pasika ifatwa nk’umunsi w’ibyishimo bikomeye ku Bakristo, ikaba isozwa ry’igihe cy’igisibo kiba cyaramaze iminsi 40 cyo kwitegura uwo munsi.
Impamvu Pasika ihora ku Cyumweru
Pasika ihora yizihizwa ku Cyumweru kuko ari wo munsi Bibiliya ivuga ko Yezu yazutseho. Mu muco wa gikristo, icyumweru gifatwa nk’umunsi wera wihariye wo gusenga no kwibuka izuka rya Kristu.
Kuva mu bihe bya mbere by’Itorero, abakristo bumvikanye ko uwo munsi mukuru ugomba kujya uba ku Cyumweru kugira ngo ujyanishwe n’inkuru y’izuka rya Yezu.
Impamvu Pasika igira amatariki ahinduka
Nubwo ihora ku Cyumweru, Pasika ntigira itariki ntakuka buri mwaka. Ibi biterwa n’uburyo itariki yayo ibarwa hifashishijwe ikirangaminsi n’igihe cy’ukwezi (lunar calendar).
Mu kinyejana cya kane, mu nama y’Abepisikopi yabereye i Nicaea mu mwaka wa 325, hafashwe icyemezo ko Pasika izajya iba ku Cyumweru cya mbere gikurikira ukwezi kw’inzora (full moon) kuboneka nyuma y’italiki ya 21 Werurwe, igihe isi iba yinjiye mu mpeshyi (spring equinox) ku gice cy’amajyaruguru y’isi.
Ni yo mpamvu Pasika ishobora kuba hagati ya 22 Werurwe na 25 Mata, bitewe n’uko ukwezi kuzura muri uwo mwaka.
Ubusobanuro bwa Pasika ku Bakristo
Ku Bakristo benshi, Pasika si umunsi mukuru gusa, ahubwo ni igihe cyo kuvugurura ukwizera, kwibuka urukundo n’igitambo Yezu yemeye ku bw’abantu.
Ni umunsi ushimangira ubutumwa bw’icyizere, imbabazi n’ubuzima bushya, ari na yo mpamvu wizihizwa mu byishimo n’imihango itandukanye mu nsengero no mu miryango.
Nubwo amatariki yayo agenda ahinduka buri mwaka, Pasika ikomeza kuba umunsi w’ingenzi wibutsa abakristo ku isi yose igikorwa bafata nk’ishingiro ry’ukwemera kwabo: izuka rya Yezu Kristu.
