Mu rwego rwo gusigasira amateka no gukomeza gutoza Abanyarwanda indangagaciro z’ubutwari n’ubumwe, igitaramo cya mbere cya Ubutwari Tour Concert 2026 cyabereye mu karere ka Nyanza, cyahuriza hamwe abahanzi bafitse ibigwi bazwi mu ndirimbo z’uburere mboneragihugu n’abaturage b’ingeri zitandukanye, by’umwihariko urubyiruko.
Iki gitaramo cyafunguye uruhererekane rw’ibitaramo bizenguruka igihugu, bifite insanganyamatsiko igira iti “Ubutwari n’ubumwe bw’Abanyarwanda n’inkingi z’iterambere.” iki gitaramo cyitabiriwe n’abayobozi batandukanye kuva ku rwego rw’intara y’Amajyepfo kugeza ku karere, bikagaragaza agaciro ibi bitaramo bifiteye igihugu.
Abaturage bo mu karere ka Nyanza bitabiriye ku bwinshi iki gitaramo, by’umwihariko urubyiruko n’abanyeshuri bo mu mashuri yisumbuye, bari baje kumva no gusobanukirwa amateka y’ubutwari n’uruhare ingabo za PRA zagize mu kubohora igihugu.
Mu butumwa yagejeje ku bitabiriye igitaramo, Brigadier General Justus Majyambere, uhagarariye ingabo mu Ntara y’Amajyepfo, yatanze ikiganiro kigaruka ku rugendo rw’urugamba rwo kubohora igihugu n’ubwitange bwaranze ingabo. Yibukije urubyiruko ko n’ubwo urugamba rwari rukomeye, ingabo zitigeze zicika intege.
Yagize ati: “Ndabyibuka neza nari nkiri umusore ufite imyaka 18. Mu rugamba twanyuzemo, n’ubwo hari aho twabuze bamwe mu bayobozi bakomeye, ntitwigeze ducika intege. Mwe mukiri bato, muri inkingi y’iterambere; ni inshingano yanyu gufatanya mukubaka igihugu.”
Guverineri w’Intara y’Amajyepfo, Alice Kayitesi, yashimiye abaturage bi Nyanza ku bwitabire bagaragaje, abasaba gukomeza kwigira ku ntwari z’u Rwanda zitangiye igihugu, anashimangira ko kumenya amateka y’igihugu ari urufunguzo rwo kubaka ejo hazaza heza. Yagize ati: “Tugomba kumenya amateka, tukagira byinshi twigira ku ntwari zacu.”
Ku ruhande rw’abahanzi, igitaramo cyatangijwe na S/SGT Samora Machel (SMS) waririmbye indirimbo zitandukanye zirimo n’iyo yakoranye na Mariya Yohana. Yakurikiwe na Sophie Nzayisenga, wavukiye mu karere ka Nyanza, wakiriwe n’abaturage mu byishimo byinshi, asaba abitabiriye gufatanya na we mu kuririmba no kuryoherwa n’umuziki.
Nyuma ye ku hagiye ku rubyiniro , Muyango ari kumwe n’ababyinnyi, aririmba indirimbo ze zitandukanye zirimo “Karame Uwangabiye”, iyi ndirimbo yishimiwe cyane n’abakunzi be maze baraguruka bamusanga ku rubyiniro.
Igitaramo cyasojwe na Mariya Yohana, wari utegerejwe na benshi. Yashimiye abitabiriye bose iki gitaramo, abasaba guhaguruka bagataramana na we, yaririmbye indirimbo zakunzwe cyane zigaruka ku rugamba n’amateka yo kubohora igihugu, by’umwihariko “Instinzi”, yakiriwe n’ibyishimo n’amashyi menshi cyane.
Ibi bitaramo bizakomereza mu karere ka Nyagatare taliki ya 23 hakurikireho akarere ka Musanze taliki 24 Mutarama 2026.
