Umuhanzikazi Tracy Melon yavuze ukuri ku modoka yo mu bwoko bwa Mercedes Benz ihenze yerekanye vuba aha, avuga ko atari iyo yaguze amafaranga ye, ahubwo ko yayihawe nk’impano.
Mu gusobanura iby’iyo modoka, Tracy yavuze ko atigeze akoresha amafaranga ye ayigura. Ahubwo, yavuze ko ari ikimenyetso cy’ishimwe yahawe n’umuntu utarifuje kumenyekana, wamwishimiye kubera umurava, ubwitange n’imyitwarire myiza agaragaza mu muziki.
Uyu muhanzikazi yakomeje avuga ko iyo mpano ifite agaciro kanini kuri we, cyane ko ataramara n’imyaka itatu mu muziki.
Yagize ati: “Sinayiguze amafaranga yanjye. Hari umuntu wayinguriye mu rwego rwo kunshimira akazi nkora, kuririmba neza no kwitwara neza. Yanteye imbaraga zo gukomeza gukora cyane, bityo n’impano igaragaza uko banyishimira.”
Tracy yanakomoje ku makuru amaze iminsi avugwa ku muntu waba waramuhaye iyo modoka. Ayo makuru yayahakanye yivuye inyuma, ashimangira ko uwo muntu atari umukunzi we. Yavuze ko kuri ubu nta mukunzi afite (single), ndetse ko adateganya kujya mu rukundo vuba.
Yagize ati: “Uwampaye impano si umukunzi wanjye. Ndi single rwose. Nta masezerano cyangwa ibindi bintu bifitanye isano na yo. Nanjye byarantunguye cyane, bituma nibaza byinshi.”
Yakomeje asobanura ko iyo modoka itatanzwe n’umujyanama we (manager), nubwo avuga ko azi uwamuhaye iyo mpano. Tracy yavuze ko abo bakorana bose bamwishimiye, ariko uwamuhaye impano we akomeje kuba ibanga.
Yasoje agira ati: “Sinatangaza uwampaye iyi mpano kuko yifuza kuguma ari ibanga.”
