Marina yavuze ko gukorana indirimbo na Riderman byahoze ari inzozi ze, ahubwo atiyumvisha ukuntu byatinze kugeza ubwo bimusabye hafi imyaka umunani kugira ngo abigereho bakorane iyo bise ‘Everthing’.
Ibi Marina yabigarutseho nyuma y’uko Riderman asohoye iyi ndirimbo ‘Everything’ bakoranye.
Aha akaba yagize ati: “Riderman twese twarakuze turi abafana be, uzi Igisumizi cyangwa Kokoliko nkuko twakundaga ku mwita ukuntu twamukundaga? Igihe njye ninjiraga mu muziki numvaga ari inzozi zanjye guhurira nawe mu ndirimbo imwe cyagwa gukorana nawe.”
Marina ahamya ko ubwo Riderman yamusabaga kuririmba mu ndirimbo ye ari bwo yibutse ko izahoze ari inzozi ze zatinze kuba impamo.
Ati: “Uziko ejobundi ampamagaye ngo njye kuririmba mu ndirimbo ye ari bwo natekereje ko zahoze ari inzozi zanjye gukorana na we? Ndashimira Imana ko bibaye nubwo navuga ko ntazi impamvu byari byaratinze.”
Uretse Riderman, Marina yavuze ko yagize amahirwe yo gukorana n’abandi bahanzi yakuze arota gukorana nabo nka Jay Polly, Urban Boys n’abandi icyakora ahamya ko benshi mu bamutanze mu muziki aba yumva yifuza gukorana nabo kandi yizeye ko hari igihe bizaba.
Ku rundi ruhande iyi ndirimbo Marina yahuriyemo na Riderman izaba ari imwe mu zigize album ‘Umurwa w’indwanyi’ uyu muraperi ateganya gusohora mu mpera z’uyu mwaka wa 2025.
Ni album Riderman agiye gushyira hanze mu gihe anitegura kwizihiza imyaka 20 amaze yikorana umuziki nyuma yo gusezererwa mu itsinda rya UTP Soldiers mu 2006.
