Icyamamare mw’iteramakofe Umwongereza Anthony Joshua yakomerekeye mu mpanuka y’imodoka muri Nigeria yahitanye abagabo babiri bo mu ikipe ye kandi b’inshuti ze.Umuryango wa Joshua wemeje ko yakoze impanuka ari mu rugendo yerekeza mu ntara afitemo inkomoko kwizihizanya na bo umwaka mushya.
Iyi mpanuka yabereye ku muhanda munini (expressway) uhuza leta ya Ogun na Lagos umurwa mukuru w’ubukungu wa Nigeria kuri uyu wa mbere.
Joshua w’imyaka 36 uvuka mu Bwongereza afite inkomoko na bene wabo mu mujyi wa Sagamu wo muri leta ya Ogun iri mu majyepfo ashyira uburengerazuba bwa Nigeria.
Abo bagabo bapfuye bari inshuti z’inkoramutima za Joshua ni Sina Ghami and Latif “Latz” Ayodele, nk’uko byatangajwe na kompanyi ishinzwe ibikorwa bya Joshua yitwa Matchroom Boxing.
Mu itangazo, iyi kompanyi yavuze ko Joshua arimo koroherwa mu bitaro, aho yajyanywe kuvurirwa kandi ahaguma agakomeza gukurikiranwa.
Umukuru w’iyo kompanyi Eddie Hearn, yahaye icyubahiro “abagabo bakomeye” bapfiriye muri iyi mpanuka. Ati: “Muruhukire mu mahoro Sina na Latz”.
Inzobere mu iteramakofe Steve Bunce yavuze ko Sina Ghami na Latz Ayodele ari “inshuri ebyiri za hafi kurusha abandi za Joshua” kandi ko bombi bagize “igice gikomeye mu buzima bwa Joshua”.
Bunce yabwiye BBC News ati: “Babanye na we, niba atari ukuva ku ntangiriro, nibura ni mbere cyane. Latz ni umutoza bwite wa AJ naho Sina ni ushinzwe kubaka imbaraga ze n’umubiri we. Baba bari kumwe na we igihe cyose”.
Amasaha macye mbere y’iyi mpanuka, Joshua yatangaje video kuri Instagram we na Ayodele barimo gukina tennis yo ku meza. Ghami na we aheruka gutangaza amashusho ari i Lagos.
Amafoto n’amashusho byashyizwe ku mbuga nkoranyambaga yerekana imodoka bivugwa ko bari barimo yangiritse bikomeye.
Adeniyi Orojo, umwe mu babonye iyi mpanuka yabwiye ikinyamakuru The Punch ko imodoka yo mu bwoko bwa Lexus hamwe n’iya Pajero ari zo zagonganye.
Yagize ati: “Joshua yari yicaye inyuma y’umushoferi n’undi muntu iruhande rwe. Hari kandi umuntu wari wicaye iruhande rw’umushoferi, bari bane mu modoka ya Lexus.
“Abashinzwe umutekano we bari mu yindi modoka yari inyuma yabo mbere y’impanuka”.
Itangazo rihuriweho na leta ya Ogun n’iya Lagos rivuga ko Joshua atarembye kandi abasha kumenya ibirimo kuba ndetse ko avugana n’umuryango we.
Mbere bari bavuze ko Joshua “yarokotse urupfu” muri iyi mpanuka, kandi ko bagiye gukora “iperereza ryimbitse” ku cyayiteye.
Perezida Bola Tinubu wa Nigeria yatangaje ko yavuganye kuri telephone na Joshua akamwihanganisha kandi akamwifuriza “gukira byuzuye kandi vuba”.
Tinubu yanditse kuri X ati: “AJ yanyijeje ko arimo kubona ubuvuzi bwiza bushoboka”.
Joshua yari amaze iminsi muri Nigeria nyuma yo kugaragara mu mukino wavuzwe cyane kw’isi wabaye tariki 19 z’uku kwezi aho yatsinze Jake Paul kuri ‘knockout’ kuri ’round’ ya gatandatu.
Nyuma y’iyi mpanuka Paul yanditse kuri X ati: “Ubuzima ni ingenzi cyane kurenza iteramakofe. Ndi gusabira ababuze ubuzima, AJ n’undi wese wakozweho n’impanuka ibabaje y’uyu munsi”.
Uwo mukino bivugwa ko winjirije aba bakinnyi miliyoni 184$ bagabanya ubwabo, mbere y’uko ashyirwaho umusoro.
Amafaranga Joshua yakoreye kuri uwo mukino bivugwa n’ibinyamakuru by’imikino ko atigeze ayakorera mbere ku mukino umwe.
Jake Paul wasigaye yavunitse urwasaya kubera amakofe aremereye ya Joshua ni bwo bwa mbere yari atsinzwe mu mukino w’iteramakofe.
Joshua ubu amaze gutsinda imikino 29 muri 33 amaze gukina.
Umwe mu bo mu muryango wa Joshua utifuje gutangazwa amazina yabwiye BBC ko batunguwe cyane bumvise iby’iyi mpanuka kandi barimo gusenga ngo Joshua n’abandi bari kumwe bakomeretse bakire vuba.
Umuryango wa Joshua wemeje ko yari ari mu rugendo ava muri Lagos yerekeza muri leta ya Ogun aho abo mu muryango we bari bamutekegereje ngo bizihizanye na we ibirori by’umwaka mushya.
