Ishyirahamwe ry’Umupira w’Amaguru mu Rwanda (FERWAFA) ryavuze ko bamwe mu bakinnyi b’Ikipe y’Igihugu Amavubi bakoze ibitari byemewe ubwo bazanaga abana babo mu kibuga nyuma yo kwegukana igikombe cya FIFA Series 2026.
Ibi byabaye ku wa 30 Werurwe 2026 kuri Stade Amahoro, aho u Rwanda rwatsinze Estonia ibitego 2-0 rukegukana iri rushanwa ryari ryitabiriwe n’ibihugu bitandukanye. Uwo mukino witabiriwe n’abafana benshi bari baje gushyigikira Amavubi.
Amashusho yakwirakwiye ku mbuga nkoranyambaga
Nyuma y’umukino, amashusho yakwirakwiye ku mbuga nkoranyambaga agaragaza kapiteni w’Amavubi Djihad Bizimana agiye kuzana umwana we kugira ngo basangire ibyishimo by’intsinzi mu kibuga.
Icyakora ageze ku murongo winjira mu kibuga, umukozi w’umutekano witwa Frank Romeo yamubujije kwinjiza uwo mwana, amusobanurira ko amabwiriza atabyemera.
Icyo gikorwa cyahise gitera impaka ku mbuga nkoranyambaga, aho bamwe bashyigikiye umutekano wubahirije amategeko mu gihe abandi bagaragaje ko abakinnyi bari bakwiye koroherwa nyuma yo gutsinda.
FERWAFA isobanura amabwiriza agenga ikibuga
Umunyamabanga Mukuru wa FERWAFA Bonnie Mugabe yasobanuye ko ikibuga kigabanyijemo ibice byihariye (zones), kandi buri gice kigenewe abantu bafite uburenganzira bwihariye nko ku bakinnyi, abasifuzi n’abategura amarushanwa.
Yavuze ko kuzana abantu b’inyongera mu kibuga, barimo n’abagize umuryango w’abakinnyi, bisaba kubanza kubitegura no kubihabwa uburenganzira mbere.
Ati: “Mu bihe byo kwizihiza intsinzi, abakinnyi bagomba gukomeza kubahiriza amabwiriza agenga amarushanwa. Niba bifuza guhura n’imiryango yabo mu kibuga, biba byarateguwe mbere.”
Impaka ku myitwarire y’umutekano
Nubwo ayo mabwiriza abivuga atyo, hari abagaragaje ko habayeho koroherana, bituma bamwe mu bakinnyi barimo Djihad Bizimana na Manzi Thierry babasha kwifotozanya n’abana babo nyuma.
Ku rundi ruhande, imyitwarire y’umukozi w’umutekano yabujije abakinnyi kwinjiza abana mu kibuga ntiyishimiwe na benshi, barimo n’Ishyirahamwe ry’abahoze bakinira Amavubi (FAPA). Iri shyirahamwe ryavuze ko abakinnyi bakwiye guhabwa icyubahiro, cyane cyane mu bihe byo kwizihiza intsinzi.
Hagati aho, kompanyi ishinzwe umutekano Tiger Gates, ikoresha uwo mukozi, yatangaje ko iri gukusanya amakuru ku byabaye kugira ngo harebwe niba nta mabwiriza yarenzweho, bityo hafatwe ingamba zikwiye.
